Tâmât/Bir Dağdan İnerken
bir dagdan inerken
Nevâ-yı dil-keşiyle arz-ı isti'dâd eder bir kuş
Sanırsın bin nevâ-yı cenneti icâd eder bir kuş
Bu nekbet-hâne-i hîçîyi safâ-âbâd eder bir kuş
Siyeh-bahtân-ı dehr-i dûnu san is'âd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Çıkar bir nûr-ı Rahmânî zalâm-ı bî-nihâyetten
Sanırsın koptu bir pertev çerâ-gâh-ı meşiyyetten
Geçer yer yer semâlardan makam-ı sermediyyetten
Bu feyz-i pür-bedâyi'le beni irşâd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Döner bir pertev-i bârık ebed-gâh-ı muallâda
Gezer bir zulmet-i şârık şeb-i târ-ı musaffâda
Göğü yerler, yeri gökler itâatle tekazâda
Öter feryâdını Mevlâ'sına isnâd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Gehî bir nagme bir feryâd-ı hîç-âbâd olur gûyâ
Hemân bir samt-ı hîç-â-hîç olur peydâ vü nâ-peydâ
Gehî bir ra'd-ı hâmûşî ile titrer bütün eşyâ
Sükût-ı hîç-i hîç-i âlemi berbâd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Sehâbı parçalar bir el yağar envâr göklerden
Türâbı çâk edip bir şey karanlıklar çıkar yerden
Zalâm u nûr-ı mevc-efşân geçen ebhârdan, berden
Hemân feryâd u âhengiyle istimdâd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Makamullahta her bir şey mübâhîdir celâliyle
Fenâ-gâh-ı muvakkatten geçer her şey zevâliyle
Ebed-zâr-ı hüviyyette kalır her şey kemâliyle
Bu ahvâle cihânı, gökleri işhâd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Bakın bir kuş temâşâ-yı tabîatle mübâhîdir
Lisân-ı hâli der: "Bak bak şu gökler, lâ-tenâhîdir,
Bu yıldızlar, bu zulmetler bütün sun'-ı İlâhîdir.”
Füyûzât-ı İlâhîyi nasıl ta'dâd eder bir kuş!
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Gezer yer yer karanlık nûrlar, göklerde, yerlerde
Uçar pertevli zulmetler zalâm-ı hayret-âverde
Döner bir şevk-i deycûr u münevver bahr u berlerde
Hayâl ü fikre ulviyyet verir feryâd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Zalâm içre demâdem berk urur envâr göklerde
Çıkar eflâke zulmet bak! Uçar eşcâr göklerde
Gezer ervâh yer yer arzda, efkâr göklerde
Bu hâlâtı görüp izhâr-ı isti 'âd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Şu zulmet-gâhı bir cây-ı hikem-âmûza benzettim
Şu nûr-ı muzlimi bir hiç-i fikret-dûza benzettim
Şu mürgun nâlesin bir âh-ı vicdân-sûza benzettim
Tabiî sanki bir nazm-ı belîğ inşâd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Nedir bu zulmet içre berk vurur bir lem'a-ver bir ses?
Nedir bu samt-ı hiçâhiç içinde devr eder bir ses?
Nidâ-yı hâtifidir san semâvâta gider bir ses
Bu âhengiyle göklerden san istinşâd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
N'olurdu anlasam bu mürg-ı nâlânın lisânından
Nedir maksûdu âyâ girye vü âh-ı nihânından
Fakat dikkatle duydum anladım âh u figanından
Hazân gelmiş safâ-yı nev-bahârı yâd eder bir kuş
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Nidâ-yı hasret-engizi eder vicdanları pür-cûş
Sanırsın bir şehîd-i dem-huruşândır kefen-ber-dûş
Bakıp semt-i semâya âsmânı eyliyor hâmûş
Ne ulviyyet-perestâne makâl irâd eder bir kuş!
![](http://upload.wikimedia.org/wikipedia/commons/thumb/5/52/Tamat_Paragraf.png/50px-Tamat_Paragraf.png)
Bu leyl-i haşyet-efzâ bak benim subh-ı bahârımdır
Bu pertevler, bu zulmetler benim hâk-i mezârımdır