Benden ahz eyler rüsûm-ı sûzişi mahrûrlar
Öyle pûr-sûzum ki kabrim bir semenderzârdır
Keşmekeşle tu'me ettikçe vücûdum mûrlar
Bârekallah ol ne serdir kim komaz dilde keder
Meyle mâl-â-mâl olunca sâgar-ı billûrlar
Eyledi yek-ser dil-i âfâkı pür-âşûb u şûr
Fitne hallâkı mıdır ol nergis-i mahmûrlar
İnkisâr-ı tab'-ı pâk etmez kabûl-i iltiyâm
Hiç günâh olur mı yâ âyine-i meksûrlar
Zıyk-ı dil şîrîni-i magz-ı mezâkı telh eder
Mey olur efşürde-i inbîk olan engûrlar
Gamdan âzâd olmaz ey * Ekrem * dil-i ehl-i kemâl
Mârdan hâli degil dervâze-i gencûrlar
Gubâr-âlûdelik mir'âta âsâr-ı celâdandır
Dil-i sâfın keder-nâk olması mahzâ safâdandır
Şikest-i bâl-i mûr-ı kemtere yok kimsede kudret
Meşiyyet cümle-i eşyâda ahkâm-ı kazâdandır
Girîbân-çâk eder surhî-i haclet gonce-i şûhı
Zuhûr-ı vaz'-ı küstâhî gehî fart-ı hayâdandır
Veren feyz-i hevâdır aşka isti 'dâd-ı rûhânî
Hurûş-ı girye-i mestâne te'sîr-i sadâdandır
