Seyr için bir kez cemâlin şarktan tâ garba dek
Devr eder her rûz mihr-i pür-ziyâsı âlemin
Kays-veş selb-i şu'ûr et râhat ol ey bî-huzûr
Aşkla dîvâne olmaktır safâsı âlemin
Eylesiñ azm-i reh-i dâr-ı bekâ *Ekrem* n'ola
Kim tahammülden birûn oldu cefâsı âlemiñ
Her müjen bir tîr-i dil-dûz u kemândır kaşlarıñ
Reşk-bahşâ-yı hilâl-i âsmândır kaşlarıñ
Gerçi kim ham-geşte kad bir pîre benzer sûretâ
Pençe tâb-ı rûz-ı bâzû-yı cihândır kaşlarıñ
Nice gersin gögsünü bî-çâre gönlüm bî-siper
Hançer-i ser tîz-i hûnîden yamandır kaşlarıñ
Berk urır yâd eyledikçe kalbimi pür-tâb eder
Öyle bir tîg-ı tahammül-sûz-ı cândır kaşlarıñ
*Ekrem*-i şûrîde-hâl aşkına ey mâh-ı hüsn
Genc-i gamda başka bir derd-i nihândır kaşlarıñ
O rind-i feyz-yâb-ı bâde-i gülgûndur göñlüm
Ki yekser cevher-i irfân ile meşhûndur göñlüm
Hemîşe pîşesi cevr ü tegafül âdeti âzâr
Aceb bir şûh meşreb dilbere meftûndur göñlüm
