Ol bâg-ı tarâvet-eser-i fasl-ı bahârım
Ruhsârıña beñzer gül-i rengîn-terim yok
Bir şu'legeh-i âteş-i aşkım yine *Ekrem*
Bir kâhı tutuşturmaga kabil şererim yok
Neyleyim geşt-i ser-i kûyunu yâr olmayıcak
Olunurmı heves-i bâg-ı bahâr olmayıcak
Görmez ol meh nigeh-i lûtfuna şâyeste bizi
Zahm-ı tîg-ı gam ile sîne-figâr olmayıcak
Olamaz nâ'il-i dil-hâh cihânda kimse
Mihnet-i keşmekeş-i dehr ile zâr olmayıcak
Kıymet-i mavtın u lûtf-ı Hızır'ı kim bilsin
Düzelip gurbete mehcûr-ı diyâr olmayıcak
Zâhidi nüsha-ı fazl olsa da *Ekrem* çekemem
Rind-i hoş-hâl ü pesendîde-şi'âr olmayıcak
Akl ile teslîm olunsun mu bekası âlemin
Kim hudûsundan nümâyândır fenâsı âlemin
Yok gören bir ni'met-i şîrîn-güvârın hem yine
Hân-ı devletden kesilmez iştihâsı âlemin
Mest-i bî-tâb et beni sâki getir rıtl-ı girân
Dûr ola dilden gam-ı tâkat-rübâsı âlemin
