Dostum ol dem hayâlin kim harîm etti dili
Cânı cismimden dahi billâhi bîrûn eyledim
Reng-i hüsnün sîne-i sad-pâreden urdukça berk
Görmeden âlem seni aşkınla mecnûn eyledim
Hâk edip *Ekrem* vücûdum reh-güzâr-ı yârda
Bir safâ buldum ki hem a'dâyı memnûn eyledim
Bu pîç-tâb-ı dili rûzgâra söyleyelim
Dokunmasın ser-i zülf-i nigâra söyleyelim
Enîn ü giryede tek etsin iştirâk bize
Nifâk-ı bahtsızı kûhsâra söyleyelim
O nâm-dâr-ı cihânız huzûr ile aşkın
Eger verirse halel iştihâra söyleyelim
O serv-i nâzın olup pây-bûsu eyleye arz
Garîb hâletimiz cûybâra söyleyelim
Havâle eylemesin gayrı tîg-i cevri felek
Ten-i nizârımızı pâre pâre söyleyelim
Lebinde muzmer imiş neşve-i hayât o mehin
Bu sırrı *Ekrem*-i şûrîde-kâra söyleyelim
Nagme-senc-i âh u efgân oldugum demdir bu dem
Pây-kûb u dest-efşân olduğum demdir bu dem
