Hâsılât-ı derd-i hicrinden ne arz etsem aceb
Azim-i ser-kûy-ı cânân olduğum demdir bu dem
Kaydım olmaz olsa da zîr ü zeber dünyâ eger
Zîr-i pây-ı hamda mihmân oldugum demdir bu dem
Bezm-i pür-âheng-i vasl-ı yâr gelmez hâtıra
Nâle-kâr-ı künc-i hicrân oldugum demdir bu dem
Rûzgâra hükmeder mahviyyet-i mihriyle dil
Âlem-i aşka Süleymân oldugum demdir bu dem
Eylesem erbâb-ı câha arz-ı istignâ n'ola
Âsitân-ı pîre der-bân olduğum demdir bu dem
Var mı erbâb-ı hünerden *Ekremâ* esbin sürer
Fâris-i meydân-ı irfân olduğum demdir bu dem
Hasret-i bâde ile olsa tenim hâk benim
Ser-i hâkimde sirişkim bitirir tâk benim
Bilirim asl-ı şu'ûnât-ı zamânı cümle
Çekemez kuvve-i idrâkimi eflâk benim
Ola tâ her biri bir dîde-i nezzâre dile
Eyle dîdârın için sînemi sad-çâk benim
Sâkiyâ eyle siyeh-mest ü mey-âlûd beni
Dâmenim çirk-i alâyıktan ola pâk benim
