Agyâr serinden şeref-i sâyeni dûr et
Necm-i güher-i tâli'i menhûs görünsün
Sen mesned-i himmette sebât eyle kim eflâk
İbrâz-ı tabasbusla zemîn-bûs görünsün
Bir cevher-i cânsın diler *Ekrem* ki seninçün
Her bed-nigehiñ gözleri matmûs görünsün
Zevk alur germ-i'tilâfân serdi-i encâmdan
Neşveder-peydir çıkınca âdeme hammâmdan
Hiç bilir mi ehl-i gaflet vakt-i îd u mâtemi
Merd a'mi bî-haberdir devr-i subh u şâmdan
Sâf-dillerdir olan yek-dîgerinden müstefiz
Câmıñ âb ü tâbi meydendir meyin de câmdan
Bî-sükûn eyler ulüvv-i menzilet erbâbını
Behre-dâr olmaz sehâb-ı evc-gîr ârâmdan
Çektiğim Mevlâ bilir hûbândan *Ekrem* müdâm
Sûd-mend olmaz perestişle kişi asnâmdan
Dökülmüş dâmen-i imkâna câm-ı ser-nigûnumdan
Şafak bir cür'adır mevc-i şarâb-ı lâle-gûnumdan
Kalırsa devre-i hicrân-ı zülfün imtidâd üzre
Ser-â-pâ âh olub âteş yagar cism-i zebûnumdan
