Zahm-ı tîgın eksik etme sîneden kim her biri
Ser-fedâ-yı aşkınız çeşm-i temâşâdır bize
İn'ikâs-ı pertev-i mihr-i ruh-ı cânân ile
Katre-i mey şeb-çerâğ-ı âlem-ârâdır bize
Seyr kıl bir kerre nakş-ı hüsnünü âyinede
Ay din-i aşkımla ser-gerdân u rüsvâdır bize
Tahtgâh-ı himmete şâhenşeh-i devriz ki çarh
Bûse-hâh-ı tarf-ı dâmân-ı temennâdır bize
İmtinân-ı dehri çekmez ehl-i dil ikbâl için
Bâ'is-i idbâr olan ancak bu da'vâdır bize
*Ekrem* ol âyine-i pür-feyzdir kim rûy-ı yâr
Sûret-i esrâr-ı gayb ondan hüveydâdır bize
Gamzen mey-i nahvetle ser-endâz degilmi
Uşşâkını öldürmez ise nâz degilmi
Cân-suhteyim âteş-i sevdâ cigerimden
Tûfân gibi cûş eylese de âz degil mi
Mest olsa eder sırr-ı fezâyı bize ifşâ
Gamzen dahi Cibrîl ile hem-râz degil mi
Ser-beste-i zünnâr-ı ser-i zülfün olan dil
Mansûr kadar aşkla mümtâz degil mi
