İhyâ olur zemîn ü zamân nev-bahârda
Kesb-i neşât eder dil ü cân nev-bahârda
Tebşîr edince bâga sabâ makdem-i gülü
Bülbüller içre koptu figan nev-bahârda
Uşşâk-ı zârı ardı sıra dört dolandırır
Gul-geşt edip o gonca-dehân nev-bahârda
Yâd etme hicr-i yârı zamân-ı visâlde
Yoktur mesâg-ı fikr-i hazân nev-bahârda
Gülşen-nişîn olup şeb ü rûz ile i'tiyâd
*Ekrem* safâ vü zevke hemân nev-bahârda
Âşıkız dil-hâh terk-i dîn ü dünyâdır bize
Zübde-i matleb alâyıktan teberrâdır bize
Kulkul-ı mînâ hitâb-ı len-terânidir dile
Her habâb-ı bâde bir tûr-ı tecellâdır bize
Geştegân-ı cevriyiz bir çeşm-i mestin kim ecel
Dâd-hâh-ı gamze-i bî-bâk ü pervâdır bize
Nûr-ı aşkız şu'le-i peykân-ı tîr-i gamzeyiz
Cilvegeh pîrâmen-i çeşm-i süveydâdır bize
Ser-firâz-ı kâm-ı kevneyniz hevâ-yı aşkla
Tâ ki zülfün rişte bend-i cân-ı şeydâdır bize
