Bu sayfa istinsah edilmiş
33
O perî-zâd-ı rubâyende-i akl u hûşun
Dâye-i terbiyesi olsa sezâ hûr-ı cinân
Vâlid ü cedd-i keremkârı ile ol tıflı
Hak mu'ammer kıla tâ âhir olunca devrân
Dedim * Ekrem * ona bir beytle mühmel ta'rîh
Tab'ıma şevk-ı kudûmü olıcak feyz-resân
Subh-dem tâli' olup sa'dle hûrşîd-misâl
Oldı iclâl hanım şa'şa'a-efrûz-ı zamân
sene 1282
-
Târih-i velâdet
Sâhib-kemâl ü irfân ya'ni cenâb-ı Sabrî
Zâtı senâya şâyân etvârı medhe elyak
Bir mîr-i pür-hünerdir hûş-zât ü pâk-eserdir
Ahlâkı mu'teberdir yoktur nazîri mutlak
Rind-i hakîm-meşreb dindâr u pâk-mezheb
Mişvârı hâsılı hep kânûn-ı akla evfak
Efkârı mu'tedildir mecbûr-ı ehl-i dildir
İndinde iş degildir cühhâli sevmek ancak
Bir necl-i pâki ihsân etti o zâta Yezdân
Lütfıyla ide heran teksîrine muvaffak
