Olan âzâde bend-i kayd-ı âlem ehl-i gafletdir
Hücûm-ı derd ü mihnet hâlet-i idrâktendir hep
Ne demdir sîne-çâkim hâhiş-i zahm-ı cefâsıyla
Şikâyet dilde * Ekrem * gamze-i çâlâktendir hep
Meş'al-firûzı külliye-i gam âhtır bu şeb
Bezmimde çeng-i nâle-i cângâhtır bu şeb
Gördükçe nûr-ı rûyunu sultân-ı mâh-tâb
Bergeşte-sâz (?) câhtır bu şeb
Etvâr şûh gamze yaman işve dil-firîb
Ser-tâ-pâ edâları dil-hâhtır bu şeb
Her bir şerârı şu'le-i dâg-ı cünûnumun
Haclet-fezâ-yı reng-i ruh-ı mâhtır bu şeb
Ol Yûsuf-ı vefâyı gönül cüst ü cûdadır
Her bir mesâm-ı ten yine bir çâhtır bu şeb
Pür-âteşim gamınla ki ser-seng-i meşhedim
Deşt-i belâda meş'ale-i râhtır bu şeb
Hâhiş-güzâr-ı zahm-ı dem-i tig-ı yâr olub
Her dâgım * Ekremâ * dehen-i âhtır bu şeb
Şevk-aver olunca dile nezzârelerin hep
Çün gonçe-i envâr açılır yârelerin hep
