Ol şâ'ir-i yegâne ki şibh ü nazîrini
Der hulk-ı rûzgâr ne âlemdedir aceb
Ahım olınca velvele-ârâ-yı ıztırâb
Aksi kılar felekleri gûyâ-yı ıztırâb
Gözde hayâlin olsa ne dem cilve-sâz eder
Her katre-i sirişkimi deryâ-yı ıztırâb
Bi'llâh aşkın etti dili mâye-gîr-i feyz
Oldı harîm-i câna süveydâ-yı ıztırâb
Gör pây-mâle gâh sezâ hâk-i cismimi
Tâ kalmayım esîr-i temennâ-yı ıztırâb
Hûy-rîz-i tef ü tâb-ı gamım sanma dostum
Dilden tereşşüh eyledi deryâ-yı ıztırâb
*Ekrem * bu sûz u tâbla olmaz mı âh-ı dil
Arz u semâya zelzele-bahşâ-yı ıztırâb
Zuhûr-ı tâb-ı gam dag-ı dil-i sad-çâktendir hep
Serimde sûz-ı sevdâ sîne-i gam-nâktendir hep
Olurlar kec-nihâdân mâye-gîr-i neşve-i ikbâl
Husûl-i hûşe-i engûr-ı nahl-i tâktendir hep
Edânîdir medâr-ı işti'âl-i külhan-ı şûriş
Alev-gîr olması nârın has u hâşâktendir hep
