Bu sayfa istinsah edilmiş
Bir tig-ı ser-endâz çekip çârelerin gör
Geldi der-i ihsânına bî-çârelerin hep
Gör sîne-i pür-dâgımı ey vird-i tecelli
Envâr akıtır hicr ile fevvârelerin hep
Hûrşîde eder nâz olıcak sûde-i elmas
Her dâg-ı dili sînesi sad pârelerin hep
*Ekrem * gibi gördükçe ser-i zülfün olurlar
Gerden-zen-i zencîr-i gam âvârelerin hep
Kâfiye-i tâ aded-i gazel: 4
Öldür beni öldür gam-ı aşkınla harâb et
Tâ reh-güzer-i nâzına bir kabza türâb et
Bahs ile varıp ol mehe şûrideligimden
Ey âh yürü kûyuna azminde şitâb et
Hem dâgımı reşk-âver-i nirân-ı belâ kıl
Ukbâda da yâ Rab bana aşkıyla azâb et
Hûn-ı cigerin reşha-ver-i şevk edip ey dil
Her katresini dâg-zen-i mevc-i şarâb et
Âteş kesilip âfet-i sevdâ ile * Ekrem *
Tâ rûz-ı cezâ dûzahı hûy-rîz-i hicâb et
