Cihânı garka-i hûn-âb-ı eşk eder çeşmim
Zamâna olsa aceb mi mesîl-i devre-i lûh
O rütbedir gam u endûh-ı dil ki nâ-yâbdır
Yazılsa safha-i eyyâma olmaya meşrûh
O kays-ı bâdiye-gerd-i gamım ki benden eder
Me'âl-i lafz-ı melâmet makal-i aşk-ı sünûh
Hazer zamânede nâ-ehle bahs-i şi'r etme
K'olur nefâset-i tab'ı kadar kişi makdûh
Şafak degil görünen her seher-kazâ * Ekrem *
Olur feleklere teh cür'a-pâş-ı câm-ı sabûh
Yazınca ser-nüviştim hâme-i îcâd eder feryâd
Garîbim bana her dem tâli'-i bî-dâd eder feryâd
Aceb bir şu'le-i cevher-firûz-ı zât imiş aşkıñ
Cudâ oldukça dilden akl u isti'dâd eder feryâd
Ben ol mahşergeh-i aşkım ki her kabza türâbımda
Olur nâlende sad mecnûn bin ferhâd eder feryâd
Ben ol bîgâne-i âlem şehîd-i aşk-ı yârım kim
Ziyâretle ser-i kabrimde ancak yâd eder feryâd
Anı sen sanma zûr-ı darbe-i destinle peydâdır
Görüp hep zahm-ı sînem hançer-i fûlâd eder feryâd
