Bu sayfa istinsah edilmiş
Kâfiye-i cim aded-i gazel 1
Mülket-i aşka hıred râh-nümûn olmaz hiç
Kayd-ı cân bedraka-i deşt-i cünûn olmaz hiç
Sâf-tıynetleri pür-cünbüş eder şûr-ı hevâ
Rüzgâr estigi dem bende sükûn olmaz hiç
Ehl-i temyîz bulur gafletile âsâyiş
Hâbsız neş'e-i ârâm-ı uyûn olmaz hiç
Pâk-tab'ân eser-i hâdise-i gam tutmaz
Aks-i zişt-âyinede dâg-ı derûn olmaz hiç
Derim içre nice bî-bahtı şehîd etse yine
Dâmen-i gamzesi âgaşte-i hûn olmaz hiç
Gösterir dillere hengâme-i rustâhîzi
Gamzesi gibi suver-bend-i füsûn olmaz hiç
Gam ile selb-i şu'ûr eyle hemân ey * Ekrem *
Mülket-i aşka hıred râh-nümûn olmaz hiç
Kâfiye-i hâ aded-i gazel 1
Şu'â'-ı tîg-ı itâbın ki kıldı dilde vüzûh
Olub güdâhte gözden döküldü cevher-i rûh
Göreydi la'lini nâmûs-ı ekber ey şeh-i nâz
Sabâh-ı haşre kadar yâd olurdu mest-i füzûh
