Girit seferi padişahlarımızdan sultan ibrahim hân zamanında başladı (1055) . Sebebi mühimdi: padişah, kızlar agası sünbül aganıñ bazı yolsız işlerine kızdı. Onı mısıra sürgün itdi. O devirde kızlar agası olan harem agaları bir kabahat yapdıkları zaman mısıra sürülürler, ekseriyâ ömürleriniñ soñuna kadar orada kalırlardı. Şayed ölürlerse, malları ve paraları padişahıñ hazinesine aldırılırdı.
Sünbül aganıñ yanında cariyeler ve kadınlar da vardı. Bunlar hep birlikde, kalyon denilen, bir gemiye bindiler. Tamam altı yüz kişi istanbuldan böyle çıkdılar. O zamanlar ak deñizde korsan gemileri gezerdi. Bunlar eşyâ yükli gemileri ururlar, eşyâları yagma iderler, içindeki adamları esir idüb götürürlerdi. İşte bu korsan gemilerinden bir kaçı sünbül ağanıñ bulundıgı geminiñ yola çıktıgını haber aldılar. Bunlarıñ mısıra gitmek içün girid adasına behemâl ugrayacaklarını biliyorlardı. Dogru girid adasına geldiler. Limanlardan birine saklandılar, sünbül aganıñ bindigi gemi gelinceye kadar beklediler.
