Bir hâk-i cünûn üzre yatar geşte-i aşkım
*Ekrem* tenimi hûn ile pinhân ederim ben
Zannetme gam-ı dehrden âzâd olacaksın
Sultân-ı zamân ol yine nâ-şâd olacaksın
Kasdın bu meğer azm-i tarab-hâneden ey dil
Çeng ile hem-âvâze-i feryâd olacaksın
Ey şûh-ı levendâne-reviş böyle giderse
Hüsn âlemine bir şeh-i bî-dâd olacaksın
Ey kim heves-i bend-i ser-i zülfün edersen
Havfim bu ki ber-geşte vü ber-bâd olacaksın
Olsan da gönül na'ra-zen-i neş'e-i şâdî
Bir gün yine âh etmege mu'tâd olacaksın
*Ekrem* bilinir kıymetin ol mâh yanında
Bir vakt ki fıkdânın ile yâd olacaksın
Karardı çeşmime yekser cihân baht-ı siyâhımdan
Görünmez rûz-ı rûşen bir zamân baht-ı siyâhımdan
Debistân-ı belâda dershân-ı mihnet-i aşkım
Kazâ her lâhza eyler imtihân baht-ı siyâhımdan
Perîşân hâtır-ı zârım perîşân âh-ı serdimden
Yamân ahvâl-i mahzûnum yamân baht-ı siyâhımdan
