Süveydâ-yı derûna rûz u şeb sevdâ-yı zülfüñle
Göñül tesvîd eder sad dâsitân baht-ı siyâhımdan
Eder meyl-i hilâl-i mehle çeşm-i şâhid-i kâma
Hemâre sürmesâyi âsmân baht-ı siyâhımdan
Degildir kabil-i ta'dâd u tibyân hâsılı *Ekrem*
Felekte gördügüm gadr u ziyân baht-ı siyâhımdan
Cenâb-ı mîr-i memdûhü'l-hısâle peyrev olmuşdur
Urur dem hâme-i mu'ciz-beyân baht-ı siyâhımdan
Dilleri râm eyledin ol çeşm-i pür-gûlarla sen
Çok gazanferler zebûn eylersin âhûlarla sen
Âteşiñden ey gönül bir bir girîzân oldu hep
İhtilâta hâhiş ettikçe perî-rûlarla sen
Şöyle nâziktir ki reftârın gören hayrân olur
Ger hırâmân olsan ey serv-i revân cûlarla sen
Cûş eder deryâ-yı rahmet girye-bâr oldukça ben
Berk urur nâr-ı celâl âteş-nisâr oldukça ben
Mahv olup aşkınla cismim bî-nişân olsun Hudâ
Minnet-i gerdûn ne lâyık dehre bâr oldukça ben
