Mürtefi'dir ol kadar eyvân-ı kadrin kim ana
Bir kemîn süllem değil arş-ı ulâsı âlemin
Pertev-i envâr-ı rûyundan fakat bir zerredir
Âftâb u mâhtâb-ı pür ziyâsı âlemin
Feyz-i aşkınla berî kıl ma'siyetten *Ekrem*'i
Yâ Resûla'llah sensin Mustafâ'sı âlemin!
Mu'ammer kıl cihân durdukça yâ Râb şâh-ı zî-şânı
Odur zîrâ hakîkatta vücûd-ı âlemin cânı
Nice şâh evc-i lutfun mâhtâb-ı âlem-ârâsı
Nice şâh âsmân-ı şevketin hurşîd-i rahşânı
Zamâna lutf-ı tab'ı terbiyet-bâhşâ-yı âsâyiş
Cihâna feyz-i adli mâye-i iksîr-i umrânî
Müsellem destine şemşîr-i düşmen-gîr-i Behrâmî
Musahhar tigına ser-tâ-ser mülk-i cihânbânî
Murassa' şeb-çerağ-ı devletiyle tâc-ı Dârâyî
Muşa'şa' berk-ı tig-ı satvetiyle taht-ı Osmanî
Süleyman kevkebe Abdülazîz-i arş-mesned kim
Perestârı Ferîdûn u Sikender olsa erzânî
[1] Sene 1281'de tanzîm olunmuş ise de takdîm olunamamıştır.
