Bakdıkca tâb-ı reng-i ruh-ı yâre âftâb
Düşmüş sükûn-ı hayrete bî-çâre âftâb
Zannetme hayt-ı şu 'le olup nâ-şekîb-i aşk
Etmiş nikab-ı ismeti sad pâre âftâb
Ey mâh-ı işve cilvegehin olalı zemîn
Bir dagdır bu künbed-i devvâra âftâb
Her rûz dehre arz-ı kumâş-ı cemâl eder
Beñzer bakılsa şâhid-i bâzâra âftâb
Bir zerre tâb-ı ârızıñı görse bî-gümân
Abdâl-dil gibi gezer âvâre âftâb
Sanma sehâb mâtem-i hicrinle kisvesin
Hem-reng eder felekte şeb-i târa âftâb
Dil tesliyet bulurdu bakıp hicr-i yârda
* Ekrem * olaydı kabil-i nezzâre âftâb
Sâkî katınca bâde-i şâdî-i mâye âb
Gûyâ ki seddolundu safâ-yı rübâba bâb
Her elfi nahl-i tûr-ı tecellâya benzedi
Verdikce nûr-ı dîde hurûf-ı kitâba tâb
Gamzeñ nihâni etmese gâhî nüvâzişi
Billâh dil götürmez idi bu itâba tâb
