Nağme-i Seher/Kafiye-i Zâ/Yedinci Gazel
< Nağme-i Seher | Kafiye-i Zâ
Kimki kavlinde sebât-âver-i peymân olmaz
Akl ile ilm ile irfân ile insân olmaz
Matleb-i feyzi hevâcisten olan âzâde
Sıyt-ı nâm olmak için gıbta-keş-i şân olmaz
Ol nesâyih kim ede ka'ili zıddıyla amel
Bi't-tabi' kimsede icrâsına meylân olmaz
Dogrı söz cevher-i mutlak gibidir halbûkim
Cevheriñ kıymeti bir hâl ile noksân olmaz
Kişi dünyâya gelür hayr u şeri bilmek için
Hayf kim vâsıl-ı ser-menzil-i irfân olmaz
Derd çok ga'ile bisyâr hayât ise kasîr
Neylesin kesb-i kemâl etmege meydân olmaz
Şöyle ma'mûrdur iklîm-i harâbât * Ekrem *
Haşr u neşr olsa yıkılmaz yine vîrân olmaz