Nağme-i Seher/âdır uyaklı sitâyiş
Sitâyiş[1]
Hilâl-i mâh-ı rûze âsmân üzre hüveydâdır
Ser-â-ser rûy-ı arza her gece envâr-bahşâdır
Hilâl ammâ ki hân-ı ni'met-i gufrân-ı Yezdân'a
Hakîkatte Müselmânân içün engüşt-i îmâdır
Hoşâ mâh-ı safâ-bahş-ı-kulûb-ı ehl-i îmân kim
Kudûmüyle gürûh-ı mü'minîn üşküfte sîmâdır
Zihî eyyâm-ı ferruh-fâl ü hoş-hâl-i mübârek kim
Cihân âzâde gamdan şimdi her sûlarda pûyâdır
Olur mu gayrı rindân-ı Hudâ hâhişger-i işret
Nevâl-i sufre-i iftârı gör hem keyf-i sahbâdır
Cevâmi' bâgzar-ı nev-bahâr-ı fezy-i akdestir
Menâr üzre mü'ezzin andelîb-i nagme-pîrâdır
Olup kandîl-i reng-â-reng ile pür-sû-be-sû esvâk
O tertîb-i dil-ârâ üzre gûyâ necm-i garrâdır
Zemînde âsmân şeklinde pür-nakş u nigâr oldu
Bilinmez hâk-i İstanbul mudur yâ çerh-i vâlâdır
Degildir encüm-i seyyâre şehrâyin edip sıbyân
Havâlanmış kanâdîl-i pür-envâr-ı şeb-ârâdır
Aceb revnak-pezîr-i lutf-ı Mevlâ oldu âlem kim
Gönül fart-ı mesârrından bu beyt-i pâki gûyâdır
Mücessem şevk u şâdî-i tarab-zâ-yı keder-âşûb
Mükemmel sûr-ı yagma-güster-i endûh-fersâdır
İki âfet gibidir ma'nîde rûz u şeb-i rûze
K'olunsa nazra-i im'ân biribirinden a'lâdır
Ne rûz âyine-i safvet-ver-i ruhsâre-i ümmîd
Ne şeb gencîne-i nâ-yâb-ı feyz-i lutf-ı Mevlâ'dır
Biri hemçün cemâl-i pâk-i cânân pür-fer ü tâbiş
Biri mânend-i hatt-ı tâze-i dil-ber mutarrâdır
Aceb mi âşıkane bir gazel tarh eylesem şimdi
Hâyâl-i yâr zîrâ dilde âteş-bâr-ı sevdâdır.
Nigâhı fitnede Hârût'a bir üstad-ı yektâdır
Ki âlem ser-te-ser sihriyle ser-gerdân u şeydâdır
Te'âlâ'llâh zihî mihr-i cemâl-i feyz-i yâri kim
Meh ü hurşîd-i gerdûn rûz u şeb vakf-ı temâşâdır
Göñül bî-çâre yâr âvâre rûy-ı baht ise kare
Aceb da'vâ aceb sevdâ aceb olmaz tevellâdır
Hayâl-i kameti eksik degil bir lâhza hâtırdan
Hemîşe mülk-i dil mahşer gibi pür-şûru gavgadır
Nice baksun beyâz-ı gerden-i billûruna zîrâ
Görünce aksini âyînede ser-mest-i sevdâdır
Nice dâd eylesün uşşâkına ol hod-perest-i nâz
Ki cân-sûzî-i aşkından o da mu'tâd-ı şekvâdır
Penâh-âver olub dergâh-ı lutf u adline dâ'im
Anıñçün dâd-hâh-ı pâdişâh-ı kişver-ârâdır
O şâhenşeh ki ednâ bende-i dergâh-ı vâlâsı
Yedi iklîme İskender gibi fermân-fermâdır
O şâhenşeh ki rîzesiniñ gerdânı sim rahşı
Murassa-yı tâc-ı şâhane cihân üzre hevâdadır
O şâhenşeh ki vasf-ı zât-ı pür-cûd u atâyâsı
Şeker-rîz-i zebân-ı kudsiyân-ı arş-ı a'lâdır
Süleymân-pâye Han Abdülazîz-i dâd-fermâ kim
Vücûd-ı pâki dehre ni'met-i Mevlâ-te'âlâdır
Yegâne şehsüvâr-ı arsa-i rezm ü celâdet kim
Şerâr-ı na'l-i rahşı tâb-sûz-ı hayl-i a'dâdır
Hıdîv-i rûzgâr-ı ma'delet kim sıyt-ı iclâli
Sanem-bahş-ı şehinşâhân-ı heft iklîm-i dünyâdır
Aceb bir nüsha-i pâk-i füyûzât-ı Hudâ'dır kim
Ne gûne fazl u himmet dersin anda cümle peydâdır
Fehîm-i nüktedândır mû-şikâf-ı ehl-i hibrettir
Dilâverdir sahîdir dâver-i dindâr u dânâdır
Hıdîv-i bende-perverdir müket-senc ü sühanverdir
Penâh-ı saltanattır mültecâ-yı dîn ü danyâdır
Murassa' tahtgâh-ı devlet üzre şâh-ı zî-şândır
Muâllâ âsmân-ı şevket üzre mâh-ı garrâdır
Fürug-ı re'y-i âlem-gîri mihr ü meh gibi rûşen
Zamîr-i enveri âyineler vârî mücellâdır
Miyân-ı bezmde nâzende bir şûh-ı kamer-tal'at
Gehî meydâna çıksa şîr-i kûh-endâz-ı gavgadır
N'ola ger pâyına sükkân-ı ulvî çehre-say olsa
Hazîz-i âsitânı arş-ı a'lâdan mu'allâdır
N'ola İskender'i ger kılsa mî-âhûr-ı ıstablı
İnân-gîr-i küheylân-ı sebük-cevlânı Dârâ'dır
Ne güçtür böyle bir şâhenşehi memdûh edinmek kim
Kemâl-i cûd u fazl u şevketi bîrûn-ı ıtrâdır
Dü-desti âleme bahş-ı dür ü gevher kılar gûyâ
Biri kan-ı mürüvvettir biri bahr-ı atâyâdır
Gözünde dürr ü sîm ü gevher ü zer zerreden kemdir
Yanında şeb-çerag-ı âlem-ârâ seng-i hârâdır
eder her mürde-i sad-sâle-i derd ü gamı ihyâ
Nesîm-i hulku gûyâ kim dem-i can-bahş-ı İsâ'dır
Ser-â-ser âlemi teshîre kılsa himmeti niyyet
Nüfûz-ı emr ü fermânı hemân mevkûf-ı îmâdır
Ne güçlük var cihânı mülküne zannetmege zîrâ
Cünûd-ı fevz ü nusret hem-idâd-ı mevc-i deryâdır
Cünûd olmasa da yek başına tevfîka mazhardır
Ki dâ'im maksadı icrâ-yı emr ü hükm-i Mevlâ'dır
Zamân-ı adl ü dâdında bi-kavl-i Nef'-i sâhir
«Gazâle saydgâh-ı şîr-i ner cây-ı temâşâdır»
eger maksûd edinse rûzgârı durdurur fi'l-hâl
Süleyman gibi ahkâmı rehîn-i hüsn-i icrâdır
Vücûd-ı pâki bir sun'-ı bihîn-i dest-i kudrettir
Ne gelmiştir nazîri ne gelir bî-misl ü hem-tâdır
Onuñ medhinde gûyâ söylemiştir Sâmi-i merhûm
Bu beyt-i dil-nişîni kim metîn ü pâk ü ra'nâdır
«Nihâd-ı pâki ıtr-ı kabiliyyetle muhammerdir
Zamîr-i fıtratı iksîr-i hikmetle murabbâ'dır»
Nice tavsîf olunsun böyle bir feyz-i mücessem kim
Ne ta'bîr eylesem eltâfına nisbetle ednâdır
Kader kudret hudâvendâ cihân-perver şehenşâhâ!
Vücûd-ı es'adın pîrâye-i taht-ı mu'âllâdır
Sen ol şâhenşehe evreng-i dâd u ma'deletsin kim
Zamân-ı lutf u cûdun subh-ı ıyd-âsâ tarab-zâdır
Keremde sen gibi bir dâhi görmüş mü aceb devrân
Kemîne bahşişin dil-sîr-sâz-ı pîr ü bernâdır
Ne kadir şükrünü bu lutfunun îfâya âdem kim
Cihân mihnetten âzâde te'ellümden müberrâdır
Saña arz-ı ubûdiyyettir ancak maksadım yoksa
Kef-i cûdun hemâre lutf u ihsâna müheyyâdır
Baña hem bundan a'lâ ni'met olmaz kim meserretle
Sühanda ta'b-ı şûhum şimdi cüst ü bî-muhâbâdır
Aceb pâkize-gû bir şâ'ir-i vahy-âzmâyım kim
Yazılsa levha-i hurşîde şi'r-i pâkim ahrâdır
Dem-â-dem âlem-i endîşede mi'râc eder tab'ım
Ney-i hâmem tasavvurda bürâk-ı bâd-peymâdır
Olur kim görse hevl-i fitnesinden haşre dek medhûş
Devât-ı çeh-nişânım tâs-ı sihr-i ibn-i sînâ'dır
Dilim bir sûmnât-ı büt-perestân-ı tahayyüldür
Ki tab'ım Meryem âguşunda endîşem mesîhâ'dır
Bunuñçün birinin kârı me'âbidden tenezzühtür
Anıñçün dîgerinin âdeti ma'nâyı ihyâdır
Aceb işretgeh-i hüsn-i beyândır meşreb-i sâfım
Ki her lafz-ı terim bir sâgar-ı serşâr-ı ma'nâdır
Olur mu neş'e-ver hussâd şi'r-i âb-dârımdan
Ki her bir noktası aynında bir dâg-ı süveydâdır
Edâ-yı şûh-ı rengînimde yoktur şîve-i taklîd
Bu mahzâ bana mahsûs özge bir vâdi-i zibâdır
Olursa böyle olsun nazm-ı dürr ü gevher-i güftâr
Temâşâsı perîşânı da ıkd-i süreyyâ'dır
Bu hâsiyyetle nazm u nesrde ger tab'-ı pür-feyzim
Teferrüd iddi'âsı eylese makbûl da'vâdır
Yeter *Ekrem* temeddüh şimdi farz-ı ayn olan ancak
Du'â-yı devlet ü ikbâl-i şâh-ı âlem-ârâdır
Gelip tâ her sene şehr-i sıyâm-ı magrifet encâm
Kudûmüyle meserret-bahş-ı kalb-i pîr ü bernâdır
Mu'ammer hem muzaffer eyleye Hak zât-ı kudsîsin
O eyyâma degin kim rûstehîz-i haşr-ı ber-pâdır