Kargalar
Kargalar
Birkaçı gökte per güşâ-yı vedâ
-Çırpınır, çırpınır marîz ü tebâh-
Arzın üstünde eyliyor ibdâ;
Arzın üstünde bir sehâb-ı siyâh!
Ötede birkaçı nizâr u 'alîl
-Ediyor âsumana rekz-i nigâh-
Servin altında eyliyor teşkil
Servin altında bir mezâr-ı siyâh!
Biri karşımda kimsesiz, mugber
-Per şikeste, zelîl ü bîhemrâh-
Ka'r-ı kalbimde lânedâr inler
Ka'r-ı kalbimde bir hayâl-i siyâh!
1308
Cenab Şahabeddin