Handeler

Gözünde hep cevelânı riyâh-ı sevdânın,
lebinde hep nakaratı neşîde-i emelin,
Ziyâsı hande olan bir cihân-ı şeydânın
Sevâhilinde gezen bir sebükmizâc gelin...

O işte böyle henüz on beşinde bir şeydâ,
Sezâ-yı bûs u perestiş bir âteş-i zîrûh;
Bir âfitâb-ı ufk nâşinâs u bîpervâ
Ki her şerâresi bir neşve-i mûzî-i sabûh.
Onun hadîka-i ruhunda her dakika güler
Bütün leyâl-i hayatın seherleriyle bütün
Uzun kederleri ta'kib eden meserretler!

Gören sanır, o güzel handeler onun lebidir,
O handeler ki birer penbe bûse olmak için
Leb-i muhabbete karşı ricâ eder gibidir!

Cenab Şahabeddin