Dilerim Kalb-i Zârımı Her Ân

Vikikaynak, özgür kütüphane

Dilerim kalb-i zârımı her ân
Senin garâmına bir mehd-i ihtizâz etmek...
Ayırır korkusuyla dest-i zamân
Samîm-i kalbimi bir gün vedâd-ı nâzından
Dilerim genç iken ölüp gitmek!

Senin dizinden ederken semâya medd-i nazar
O muhabbetle terk-i cân etsem,
O hâb-ı nâmütenâhîde rûz-ı haşre kadar
Sana dâir ziyâlı rü'yâlar
Görür de zulmet-i hicrânı fark u hissetmem.

Mey-i sevdâ-yı pâydârımla
Garîk-i vecd olarak terk-i cân eder giderim;
Seni zannetme âh ü zârımla,
O demde manzara-i serd-i ihtizârımla
Seni zannetme dilfigâr ederim:

Hayâl-i hecr-i müebdedle rûhum aglarken
Seni aglatmamak için gülerim;
Muhabbetinden ölürken firâş-ı nez'imden

Uzatıp dest-i râ'şedârımı ben
Senin gözündeki bir girye dâneyi silerim!

Cenab Şahabeddin