Vebanın Def‘i İçin Sıbyan Mektebi Talebelerinin Duaya Çıkmasına Dair Buyruldu

İstanbul ve Üsküdar ve Eyüp ve Galata kādîlarına; Bi-hikmetullâhi te‘âlâ bir müddetden beru ibâdullâhın mübtelâ oldukları vebâ illet-i müşkilesinin indifâ‘ı zımnında dergâh-ı Sübhânî’den tazarru‘ ve niyâz ve esbâb-ı lâzımeye teşebbüs olunmak lâzımeden ve edi‘iyye-i sıbyânda eser-i icâbet meşhûr idüği bedîhiyâtdan olmağla imdi Dersa‘âdet’de kâ’in mekteb hocaları mekteblerinde olan sıbyânı aralık aralık bi’l-istishâb semtlerine yakın olan sahraya azîmet ile illet-i mezkûrenin def‘i içün hâlisâne tazarru‘ ve du‘â eylemeleri husûsunu bi’l-cümle mekteb hocalarını celb ile ifâde ve tenbîhe mübâderet eyleye deyu. Fî 5 L sene [12]27/12 Ekim 1812.