Sayfa:Zafername Şerhi (Ziya Paşa).pdf/8

 Zât-ı Hazret-i Sadâret-penâhî'nin girid memuriyetlerinde muzafferiyetlerine dâ'ir İzmid Matasarrıfı Sa'âdetlü Fazıl Paşa Hazretleri'nin Nazm Eylediği Zafer-Nâme'dir


Bârek - Allah zihî kevkebe-i âlü'l-âl
Levhaş - Allah aceb nusret ü feyz ü ikbâl

Hak bu kim görmedi âgâz edeli devre felek
Böyle bir feth ü zafer böyle şükûh u iclâl

Lerze saldı feleğe na'ra-i «Hayyâk-ı allah»
Ra'şe verdi küreye gulgule-i «Yâ Müte'âl»

Kimseler olmadı bu feth-i mübîne mazhar
Ne Sikender ne Hülâgü ne Sezâr ü Anibal

Âferin himmetine âsaf-ı âli-kadrin
Oldu şâyeste-i tevfîk-i Cenab-ı Müte'âl

Girid'i aldı gerü savlet-i seyf ü kalemi
Halkına gelmiş iken dâi'iye-i istiklâl

Devlet'i eyledi bir öyle belâdan âzâd
Yoksa pek müşkil olurdu şu zemânda ahvâl

İhtiyâr eyledi bu kışda şu müşkil seferi
Yoksa kim etmiş idi kendisini istiskâl
 
Bu ne hayret ne hamiyyet ne şecâ'tdir bu
Hiç görülmüş mü tevârih-i selefde emsâl

Askere verdi kumandayı misâl-i Bonapart
gerçi kim gelmedi şu silsilesinde ceneral

Vermedi ablukada şân-ı Donanma'ya halel
İngiliz devletine olsa sezâdır amiral


Vâkı'â haylice cân haylice mâl oldu telef
Etdi ammâ ki cezîre şerefin istihsâl

İktifâ eyledi «el-afvü zekâtü'z-zafer»e
Etmedi tâife-i bâgıye'yi istîsâl

Ya o takrir ki tafsil eder icrâ'âtı
Hüsn-i ta'bir ü belâgetde bulunmaz emsâl
 
Ser-be-ser şîve-i tafsil eder icrâ'atı
Hüsn-i ta'bîr ü belagatde bulunmaz emsal

Ser-be-ser şîve-i i'câz ü ser-â-ser mazmûn
Lâfzı pür-nükte ve her nüktesi lebrîz-i hayâl

Kan saçar hâme-i hûn-rîzi mürekkeb yerine
Meşrebi ma'reke-i rezm'e olunca meyyâl

Zülf-i yâre dokunur mes'elede hâmesinin
Târ-ı ma'na dökülür pâyine kangal kangal

Yazdığı şeylere Mümtaz ü Fu'âd alkış-hân
Gördüğü işlere Takvîm'ü Cerîde dellâl