Sayfa:Zafername Şerhi (Ziya Paşa).pdf/10

Öyle düştûr-ı mu'azzam ki Nakibü'l-eşrâf
Gelse ger meclisine câyı olur saff-ı ni'âl

Öyle nâzik ki eger şapkalı bir kunduracı
Evine gelse eder tâ kapudan istikbâl

Öyle bir cerbeze-i nutku da var kim eyler
Hasmının hakkı dahi olsa elinde ibtâl

Cok mudur Avrupa'ya gitse ukâb-ı şânı
Beykoz'a Gekbüze'den gelse aceb mi kartal

Kahrına uğramadı uğrasalar bir kerre
Ne tavanlarda gezer fâre ne dağlarda çakal

Hep te'enni-yi hakimâneden eyler neş'et
Tab'-ı pakinde eger var ise cüz'i ihmal

Himmet ü meşrebi de kaddi gibi âlidir
Çünki esmâ olunur nâsa semadan inzâl

Sayesinde o kadar etdi cihân kesb-i huzur
Eylemez kimse du'âsında dakika ihmâl

Hânmânı yıkılurdı nıc·e ehl-i hünerin
Cânib-i afva eger olmasa tab'ı meyyâl

Nakd-i va'di ile hemyân-ı zaruret leb-riz
Zer-i lütfu ile ceyb-i fukara mâl-â-mâl

Kâle-i servet ü dârâtına olmaz arşun
Galle-i ni'met-i bi-gâyeti bilmez mikyâl

Vâli-yi Mısr ile Sultân'dan alurdı ihsân
Maksadı olsa idi cem'-i nukûd ü emval

Beytini mâlini yakdı ise eger nâr-ı harîk
Kârgirini binâ eyler anın Beytü'l-mâl

Âsafâ himmet-i mahsusa-i tedbirindir
Eyleyen Devlet'f bu hadd-i kemâle isâl

Geldi bir halete kim Devlet-i Osmâniyye
Hissolunmaz gibidir şâ'ibe-i izmihlal

Ne dirâyet bu ki yirmi senedir va'dederek
Aldadup Avrupa'yı âlemi etdin iğfal

Bu ne tâli' ki cihân hasmın iken bunca zemân
 Müstakillen olasın taht-nişîn-I ikbâl

Müslüman la’net eder gayr-I müselmân la’net
Kimseler kıymetini bilmedi hâlâ bu ne hâl

Erba’îne kadar elbette sürer germî-yi bahs
İstesem ben ne kadar vasfını etmek icmâl

Âsafâ ömrümü evsâfına hasr eyleyeyim
Bir zemân kâbız-ı ervâh ederse imhâl