Mihnetle olur sâgarımız kâse-i zehr-âb
Gamdan dilimiz âh nice âreleriz biz
Meyl eylemeyiz ni'met-i elvân-ı fenâya
Hicriñle bu âlemde ki gam-hâhlarız biz
Mûsâ'larıyız tûr-ı tecellâ-yı cemâliñ
Sad perde hicâb olsa yine pâreleriz biz
Bülbül gibi mahrem degiliz bâg-ı cemâle
Bir dem ruhuña ka'il-i nezzâreleriz biz
* Ekrem * gibi âfet-res-i ikbâl-i cihânız
Âh eyleyerek bahtımızı kareleriz biz
Lâ'l-i lebi bir bâde-i nâb-ı tarab-engîz
Gül-ruhları hem-reng-i hızâb-ı tarab-engîz
Gül-bang-i nevâ-senci-i hicrân ile pürdür
Dil-hânesi bir cây-ı harâb-ı tarab-engîz
Hem agladı hem güldü dil âzâr edicek yâr
Hiç görmemişim böyle itâb-ı tarab-engîz
Bir mertebe âhenge kıyâm eyledi gönlüm
Seyrânına vakf oldu rübâb-ı tarab-engîz
Ol beççe-i mutrible aceb kangı zamanda
Gönlüm ola hem-nûş-ı şarâb-ı tarab-engîz
