Zehr-âb-ı gam-sıfat ola âri humârdan
Ol gülden ara neş'e-i bûy-ı vefâyı kim
Pejmürde şâh u berg ola âh-ı hezârdan
Dil-besteyiz o va'de ki billah adîm olur
Hızr olsa imtidâd-ı dem-i intizârdan
*Ekrem* dil-i hazînime bâlîn-i hâb olur
Her seng-i gam ki vâsıl olur sûy-ı yârdan
Gamzesi olmaz cüdâ bir dem dil-i dîvâneden
Geçmez ol hûnî safâ-yı kûşe-i meyhâneden
Hâtır-ı cemşîd-veş eyler neşât-âbâd-ı şevk
Yâd-ı lâ'lin kim geçer gâhî dil-i vîrâneden
Hayf kim cevrinle hâlâ imtihân eyler kazâ
Biz ki dûr olsak da cândan geçmeyiz cânâneden
Mey değil zehr-âb olursa neş'e-yâb eyler dili
Zâhir oldukça o reng-i âteşîn peymâneden
Tîgına cân vermege âmâdeyim ammâ gönül
Cevher-i aşkın nice hıfz eylesin bîgâneden
* Ekrem * ol rûh-ı revânıñ neş'e-i zahm-ı gamı
Tâ kıyâmet zâ'il olmaz hâtır-ı mestâneden
