Şitâ-yı hengâmı bir şeb ki hâne-i fakirânemde kûşegizin-i vahdet ü tenhâyı idim. Havali-yi derûnumuñ mâlî oldıgı endûh ... def' içün matbaa'i hayâl ile kişt-i mevâki' i'tidâl iyledigim sırada kendimi giceleyin bir 'azîm ormanıñ ortasında bularak tarafeyni gayet sık çalı ve agaçlarla mesdûd bir ince yoldan gitmege başladım. Hava gayet latif ü sakin ve gökyüziniñ cihet-i şarkiyesiniñ gitdikce agarub turması tulu'-ı mâhitâb-ı cihântâbı mu'lîn itdi. Kâh enfâs-ı nesîm ile evrâk-ı eşcârıñ birbirine şiddetle temâs itmesinden ve çalılar arasında lâne .. olan kuşlarıñ benden ürkmeleriyle uçdukları zaman taharriniñ ecnihâ eylemesinden hâsıl olan sadâ-yı hafif ü lâtifiyle mürgân-ı şebistânıñ zemzemesini diñleyerek kâh 'âlem-i âsumâna tevcih-i nigâhla top top olmuş beyâz bulutlarıñ birbirinden ayrılub yine top olışını temâşa iderek bir beş dakika kadar gitdikten soñra ... bir düz çemenzâra vasıl oldım. Bu çemenzârda cihet-i şarka müteveccihân duruldukda sag tarafında ve bir kırk hatve uzakda diger bir küçük orman dâhilinde geldigim yol gibi bir ince târîk ve ön tarafda takriben on hatve vüs'atda bir nehir ve nehiriñ öte tarafında vâsi' bir sahra
