ayırmaz. On altı yaşına kadar fukara çocukları hükümetçe iskân ve infak ve terbiye olunur.
24 — Teşebbüsat-ı nafiada imtiyazat usulü yoktur. Tesisat-ı nafıanın kâffesi halkın hukuk-ı umumiyesi miyanına dahil ve hükümetin taht-ı idaresindedir.
25 — Halk Zümresi, adalet esaslarında netayic ve hadisat ile değil esbab ve müessirat ile mücadelenin müsmir ve müessir olduğuna kanidir. Binaenaleyh her nevi ihtirasat ile rüchan ve tefavvuk daiyelerini, maraz-ı infialat-ı ruhiyeyi, ırsi ve ecdadi sevaık-ı beşeriyeyi ıslah edecek müessesata, mahkemelerden, hapishanelerden ve bunlara müntehi olan bütün cürüm ve ceza hakkındaki nazariyelerden ziyade ehemmiyet verecektir.
26 — Tedricen, âzâsı halk tarafından Halk Mahkemeleri teşkil olunacak ve hapishaneler daru'l-mesai haline kalbedilecekdir.
27 — Refah-ı umumîyi mesainin aheng-i intizamından çıkaracak olan Halk Zümresi, muhtekirlerin hiyel ve desaisle cem ve celb etmiş olduğu magsubattan nefretle en sahih sermayeyi sâ'y u amelden ibaret bilir. Teraküm ve inhisarı gayr-i caiz olan menafiin azamî mikyas ile husul ve tevzii için istihsal ve istihlal kooperatifleri vücuda getirilecektir. Ticaret-i hariciye, hükümetin taht-ı himaye ve murakabesinde bulunan bu teşkilât marifetiyle yapılacaktır.
28 — İşbu siyasî program muhteviyatının temin-i tatbiki için muktazi kavânîn ve nizamat ihzar ve teklif etmek üzere zümre mensubininden ve mütehassısînden mürekkep zevat işe başlayacaktır.
