Osman Şems’in Nef‘î’nin Na‘tine Naziresi
Hızr-ı âlem ilminin râz-ı nihânıdır sözüm
Reşha-i âb-ı hayât-ı câvidânîdir sözüm
Kalbime ilhâm olur gayb âleminden söylerem
Kim sünûhât-ı Cenâb-ı Müsteânîdir sözüm
Rûh-ı Kudsî-menzilem ihyâ-yı emvât eylerem
Kim nüsûs-ı mürdenin rûh-ı revânıdır sözüm
Dürr-i nazmımdan olur erbâb-ı irfân müstefîd
Kâlıb-ı âgâh-ı kalbe rûh-ı sânîdir sözüm
Satrının her noktası bir mühr-i âlem-gîrdir
Âsumân-ı fikrimin çün kehkeşânıdır sözüm
Ol cihân-ı ma‘rifetdir sâha-i gönlüm k’anın
Gevher-i lü’lü’-i bahr-i bî-kerânıdır sözüm
Nûr-ı vahdet-âsumânı mehr-i âlem-tâbıdır
Sâbit ü seyyâre-i cevher-feşânıdır sözüm
Kişver-i sînemdir ol gülzâr-ı şehristân-ı aşk
Bûy-ı verd ü âteş-i dil-sitânıdır sözüm?
Hasm-ı dîne yâre-i cân-sûz olur her noktası
Dest-i kudret hâme-i âteş-zebânıdır sözüm
Gûyiyâ Fir‘avn-ı Kezzâb’a Kelîm-i Sâdık’ın
Ejder-i âteş-feşân u dem-keşânıdır sözüm
Kande olsa sayd-ı âhû-yı taleb eyler nigâh
Kim velâyet mîşesi şîr-i jiyânıdır sözüm
Mağz-ı Kur’ândır velî Kur’ân gibi her dostun
Nüsha-i ta‘vîz-bend ü hırz-ı cânıdır sözüm
Eylerem hısnü’l-hasîn-i şer‘-i pâke reh-revân
Rehber-i dervâze-i kehfü’l-emânıdır sözüm
Sırr-ı gayb itmekde ilhâm âsumân-ı âlemin
Sanki kerrûb-i mukaddes-âşiyânıdır sözüm
Bî-zebân ü harf aşk esrârını remz eylerem
Nüktedân-ı râz-ı aşkın bî-zebânıdır sözüm
Lâ-mekân seyrânı şerhin eylerem aynen ıyân
Kim lisân-ı lâ-mekânın tercemânıdır sözüm
Eylerem şân-ı serây-ı lî-maallahı
Çün kelâm-ı bî-nişânın bir nişanıdır sözüm
Mâh-rûy-ı şâhid-i maksûd râzın söylerem
Âşık-ı şeb-zinde-dârın yâr-ı cânıdır sözüm
Ben o rûh-ı a‘zamın vassâfıyam ki neş’eden
Cebrâîl’in Sidre’de ratbü’l-lisânıdır sözüm
Ol şehen-şâh-ı huyûl-i enbiyâ kim vasfına
Hazret-i Hassân ta‘bîr-i dehânıdır sözüm
Eylemek kâbil mi kavlimle Muhammed vasfını
Bil Muhammed vasfının memdûh-ı şânıdır sözüm
Ey şeh-i taht-ı risalet v’ey habîb-i zât-ı Hak
Na‘tinin bu vech ile mu’ciz-beyânıdır sözüm
K’oldıgından mâdihin Mevlâ benim de lâ-cerem
Na‘t u evsâfında vahy-i âsumânîdir sözüm
Sen ki hayl-i enbiyâ dîvânına ser-nâmesin
Vasfına ser-nâme-i seb‘u’l-mesânîdir sözüm
Zât-ı pâkin zât-ı Hak’dan fark u temyiz itmede
Fart-ı ‘aczin nâle-i gussa-künânıdır sözüm
Ya Resulallah senden bulmışam feyz-i nazar
Sekr-i aşkın cezbesi âh u figânıdır sözüm
Öyle fâniyem ki aşkında eğer bir merd-i dehr
İstese görmek vücûdum mâ reânîdir sözüm
Buldı zikrinle leb-i şemşîr-i hâmem k’öyle nâb
Mülk-i nazmın saf-der-i sâhib-kıranıdır sözüm
Olsa söz esb-i küheyl-i edhemi çiğner geçer
Kim sühan iklîmi şâhı zîr-i rânıdır sözüm
Bir tasarruf virdi kim mihrin tıbâ‘-ı tâmıma
San velâyet mülkinin sâhib-zamânıdır sözüm
Kevser-i la‘lin idelden gönlümü ser-mest-i aşk
Aşk-ı Mevlâ’nın şarâb-ı ergavânıdır sözüm
Tâ ebed hüşyâr olmazlar içenler cür‘asın
Ol meyin kim sâgar-ı cevher-feşânıdır sözüm
Bir nefes k’enfâs-ı kudsiyyenden aldım feyz-i rûh
Mûcid-i elfâz u hallâk-ı ma‘ânîdir sözüm
Olalı hâk-i kudümün kulh-i çeşm-i cân u dil
Bahs-i ilm-i rü’yetin aynü’l-ayânıdır sözüm
La‘l-i dür-bârın lu‘âbından olaldan zevk-yâb
Cevher-i ilm-i ledün kenzü’l-maânîdir sözüm
Na‘tinin her beyti gûyâ Ravzana Bâbü’s-selâm
Bûse-gâhımdır ki ferş-i âsitânîdir sözüm
Feyz-i na‘tinle temâşâ-gâh-ı çeşm-i âlem
Âlem-i gaybın mukaddes bir cihânıdır sözüm
Ebr-i cûdun vireli feyz-i tarâvet hâkine
Nahl-i ezhâr-ı tecellî gül-sitânıdır sözüm
Levh-i mahfuz-ı kazâdır her bir evrâk-ı güli
Şerh u fasl-ı metninin azbü’l-beyânıdır sözüm
Künh-i esrâr-ı hüviyyet goncesi gaybında râz
Râzının idrâkinin keşf-i nihânıdır sözüm
Sen ki ol mir’ât-ı zât-ı Kibriyâ’sın zâtının
Cevheri idrâkinin bir nükte-dânıdır sözüm
Ya‘ni kim mâhiyyetin idrâkde ceffe’l-kalem
Gene akl-ı evvelin hayret-resânıdır sözüm
İdemez çün zâtını idrâk zât-ı Hak gibi
Ger dise mevlâ-yı sânî özr-hânıdır sözüm
Eyledim takdim hâk-i Ravzana bir deste gül
Sâye-i lütfunda anın bâğ-bânıdır sözüm
Eyleyüp tahdîs-i ni‘met söyledim evsâfını
Pâyına bir arz-ı hâl-i hâk-dânîdir sözüm
Afv idüp habt u hatâsın eyle şâyân-ı kabûl
Kim cenâb-ı pâkinin bir na‘t-hânıdır sözüm
Eyleme feyz-i nigâhın zâr-ı aşkından dirîğ
Sen bilürsin kim derûnîdir cenânîdir sözüm
El verir ey Şems na‘tin irdi pâyâna tamâm
Ba‘d-ezîn arz-ı senâ-yı şâyegânîdir sözüm
Tâ ebed ol nûr-ı Hakk’ın Ravza-i ulyâsına
Hep salât ile tahiyyât armağanıdır sözüm
|
Kaynak: Bilgin, A. (2018). Osman Şems’in Bir Na‘tin’den Hareketle Şiirin Gücü. 2, çevrim içi erişim 
Bu eser, başka bir eserin bilimsel olmayan metodlarla oluşturulmuş bir transkripsiyonu veya faksimilesi olup ana eserden bağımsız bir telif hakkı korumasına sahip değildir. 5846 sayılı Fikir ve Sanat Eserleri Kanunu'un işlenmiş eserleri tanımlayan 6. maddesine göre; henüz yayımlanmamış olan bir eserin ilmi araştırma ve çalışma neticesinde yayımlanmaya elverişli hale getirilmesi (ilmi bir araştırma ve çalışma mahsulü olmayan alelade transkripsiyonlarla faksimileler istisna olmak üzere) halinde oluşturulan eser telif korumasına tâbi olacaktır. Ancak bu eser kanunun gösterdiği istisna kapsamında olduğundan kamu malıdır. 
|