Ol Server-i Sultân-ı Cihan Şâh-ı Muzaffer
Ol server-i sultân-ı cihan şâh-ı muzaffer
Yâ’ni ki Ali vâli-i Hak Sâki-i kevser
Kevser’den eğer nûş edeyim der isen ey can
Dergâh-ı muallâsın koy cân ile bin ser
Ser saklama sır sakla eyâ mü’min-i sâdık
Râhında Ali’nin olagör sıdk ile çâker
Çâker ola İskender ü Cemşîd ü Ferîdûn
Şol kimseye kim Şâh’a ola bende-i kemter
Kemter kul olan şâha cihân içre hemîşe
Neyler kemer-i şâhı nider tâc ile efser
Efserdir eğer ister isen menzil-i âli
Gel levh-i dilin üstüne ur sikke-i Hayder
Hayder’dir eyâ bil ki imâmeyn-i şehîdeyn
Ya’nî ki Hasen biri Hüseyn Şebpir ü Şebper
Şebper şeh-i âdilden ü hem Zeyn-i abâ’dan
Ferzend-i hakîkat biliniz Bâkır u Ca’fer
Ca’fer bize sultân-ı cihân oldu bu yolda
Hem server-i din Mûsi-i Kâzım şeh-i azher
Izhâr olasın gün gibi âlemde-i mü’min
Ger ola sana şâh-ı Horâsan reh ü rehber
Rehber dahi Hak mîri Taki Şâh Nakî’dir
Oldu dü cihan içre Hasen Askeri server
Asker olasın sıdk ile Mehdî-i zamâne
Tut kavlini Şâh’ın kim odur şâfi’-i mahşer
Mahşerde eğer ister isen fırka-i nâcî
Gel ey Seherî medh-i Ali söyle serâser
Serden ne içün havf idesin zâhir ü bâtın
Şemşîr sözün Hârici’nin bağrına hançer