Nağme-i Seher/ak uyaklı Târîh-i Velâdet
Târih-i velâdet
Sâhib-kemâl ü irfân ya'ni cenâb-ı Sabrî
Zâtı senâya şâyân etvârı medhe elyak
Bir mîr-i pür-hünerdir hûş-zât ü pâk-eserdir
Ahlâkı mu'teberdir yoktur nazîri mutlak
Rind-i hakîm-meşreb dindâr u pâk-mezheb
Mişvârı hâsılı hep kânûn-ı akla evfak
Efkârı mu'tedildir mecbûr-ı ehl-i dildir
İndinde iş degildir cühhâli sevmek ancak
Bir necl-i pâki ihsân etti o zâta Yezdân
Lütfıyla ide heran teksîrine muvaffak
Kıymette tâc-ı keydir insân onunla hayydır
Dünyâda başka şeydir evlâda mâlik olmak
Kılsın hemân mu'ammer bâ-izz ü şân-ı evfer
Bu tıfl ile berâber ol mîre aklı Hak
Nâ-çâr eyler * Ekrem * tâ'rîhime cihân reşk
Verdi Hüseyn-i sıdkı bezm-i şühûda revnak
Sene 1283
-