Nağme-i Seher/Terci-i Bend-i Latîfe-Âmîz
Virmiştik ol zamâñki bütün imtihânları
Hep yagladıktı terk ü firâra tabanları
Rûzeyle hoş geçirmişidik vakt ü ânları
Bu mâtem aglatır yine hep nev-civânları
Iyd erdi geldi mektebe gitmek zamanları
Tertîbe şimdi başlayalım biz yalanları
Harbiyye gerçi mekseb-i cümle fünûndur
Meşhûn-ı feyz olduğu da bî-zünûndur
Cevr ü cefâsı lîk be-gdyet füzûndur
Görmez safâ yüzi gireniñ kalbi hûndur
Iyd erdi geldi mektebe gitmek zamanları
Tertîbe şimdi başlayalım biz yalanları
Ol dem ki nev-bahâr ile âlem safâ bulur
Kayd-ı kederden ehl-i muhabbet rehâ bulur
Bî-çâre dil muzîk-i elemde belâ bulur
Yok mu bu derd ü mihnete yâ Rab devâ bulur
Iyd erdi geldi mektebe gitmek zamanları
Tertîbe şimdi başlayalım biz yalanları
Göñlümki her mesîreyi bir bir hayâl eder
Bir gece ruhsat almaga fikr-i muhâl eder
İnsan bu yolda kendini mecnûn-misâl eder
Tenbîh-i zâbitâna nasıl imtisâl eder
Iyd erdi geldi mektebe gitmek zamanları
Tertîbe şimdi başlayalım biz yalanları
Bu kare gün ki turfa-dem-i iftirâktır
Cism-i za'îfe dâgzen-i iştiyâktır
Âhım duhânı şu'le-res-i nüh-revâktır
Yine buña sebeb adem-i ittifâktır
Iyd erdi geldi mektebe gitmek zamanları
Tertîbe şimdi başlayalım biz yalanları
Ey dûd-ı âh çerh-i berîne bir ebr ol
Eyyâmı tîre kıl felege şu'le-güster ol
Ey dil sürûr vakti degildir mükedder ol
Âmâde-i sihâm-ı kazâ-yı mukadder ol
Iyd erdi geldi mektebe gitmek zamanları
Tertîbe şimdi başlayalım biz yalanları
Yâ rab nedir bu mihnet-i dûr u dırâz-ı baht
Kıldı bizi esîr-i gam-ı can-güdâz-ı saht
Makhûr olup felek yere geçsin bu heft taht
Urduk semend-i tîz-rev-i iftirâka raht
Iyd erdi geldi mektebe gitmek zamanları
Tertîbe şimdi başlayalım biz yalanları
*Ekrem* dehân-ı mîr-Alîden bu şeb hele
Yaptık bu nev neşîdeyi hâme alıp ele
Ma'nâsı özge neş'e-i hırmân verir dile
Gâhî okursa ger dem-i hall-i mu 'âdele
Iyd erdi geldi mektebe gitmek zamanları
Tertîbe şimdi başlayalım biz yalanları