Nağme-i Seher/Konak Târihidir
Âsmân-ı azamet Hazret-i Kâmil Pâşâ
Kim odur âsaf-ı pür-cûd ü himem devrâna
Nice âsaf alem-efrâz-ı kerem kim olmuş
Mâye-bahş-ı ezelî desti bihâr u kâne
Lutf-ı tab'ı o kadar kim olamaz güncîde
Bahşiş-i yek-demesi havsala-i ihsâna
Zâtı bir nüsha-i esrâr-ı ilâhî ki ukul
Fehm ü idrâk-i me'âlinde olur dîvâne
Mû-şikâf-ı fuzalâdır ki olur haşre kadar
Dâniş-âmûz-ı hikem felsefe-i Yûnân'a
Re'yi bir mertebe rûşen ki eder bahş-ı hased
Bi kemîn lem'ası hûrşîd ü meh-i rahşâna
Nefha-i hulkunu yâd eylese bir şâ'ir eger
Satr-ı eş'ârı döner bagçe-i rızvâna
Dönse yüz bin sene ger merkez-i âlemde felek
Gelmeye bir bedeli dâ'ire-i imkâna
Bârekallah zihî revnak-ı baht u ikbâl
Dem-be-dem mazhar olur âtıfet-i Yezdân'a
İstese himmet-i mi'mâri-i lütfuyla olur
Bâg-ı cennet gibi ma'mûr nice vîrâne
Yaptı bir hâne-i nev-tarh-ı metîn ü dil-keş
Ki verir seyr ü temâşâsı safâ insâna
Nice menzil ki o kim kubbe-i sakfı olmuş
Sâye-endâz-ı inâyet felek-i girdâne
Hânedânıyla hemân Hak hazret-i azze ve celle
Müteyemmin ede ol dâver-i âlî-şâna
Ben de isbât-ı ubûdiyyet içün ey * Ekrem *
Söyledim mısra'-ı ta'rîhini üstâdâne
Okuyan gai'ib eder her dü sarâyı gözden
Cây-ı vâlâda bihîn oldu bu devlet-hâne
Sene 1281