Nağme-i Seher/Kafiye-i Hâ/Dördüncü Gazel
Dil-firîbâne edâlar düşmen-i bed-hâhta
Şîvelerdir kim ıyândır cünbiş-i rûbâhta
Etmede me'lûfunu ser-geşte-i deşt-i gurûr
Bir acâ'ib neş'e var câm-ı celâl ü câhta
Fikr-i hâl-i rûy-ı tâbânınla oldu dâg-dâr
Lekkeler sanma keleftir levh-i pâk-i mâhta
Kâr-ı müjgânın dilimde saf-be-saf çünkü durur
Mestler bir hâş eder gûyâ ki işretgâhta
Keh-keşân zannetme âteş-pâre oldu her biri
Rîze rîze cevher-i cân şekl-i dûd-ı âhta
Perdedir gaflet tecellî-i şuhûd-ı Hakk'a kim
Nûr-ı zâtı berk urur her bir dil-i âgâhta
Ârif-i billâha olmaz vâsıta tevhîdde
Nûr-ı Hak ma'lûmdur nezd-i Halîlu'llâhta
Nice mümkün derk sırr-ı zât-ı pâk-i ahmedi
Cümle muhtâc-ı atâsıdır gedâ da şâh da
Gör nigâr u nakşın *Ekrem* kilk-i mu 'ciz-kârımın
Kıl temâşa nev-bahâr-ı âlemi bir gâhta