Kullanıcı:Dr.Suskun/Taslaklar/2. Taslak

Madde 1- Hükûmeteyn işbu muahedeye vaz-ı imza edilmesini müteakip derhal ve aynı zamanda kat-ı muhasamat için tedbir-i lâzımaya tevessül etmeği taahhüt ederler. Tedabir-i mezkûrenin temin-i icrası için mahallerine suret-i mahsusada komiserler izam olunacaktır.

Madde 2- İşbu muahedenin imzası akabinde hükûmeteynden her biri yani hükûmet-i Osmaniye Trablusgarp ile Bingazi'den ve İtalya hükûmeti Adalar Denizi'nde taht-ı işgalinde bulunan adalardan kendi zabit ve askerleri ile memurin-i mülkiyelerinin celpleri zımnında emir vermedi taahhüt eder.

İtalya zabita ve asakir-i ile memurin-i mülkiyesi taraflarından Trablusgarp ile Bingazi'nin tahliyesini müteakip vukuu bulacaktır.

Madde 3- Üsera-yı harbiye ile rehineler müddet-i kalile-i mümkine zarfında mübadele edilecektir.

Madde 4- Muhasamata iştirak etmiş veya muhasamat dolayısıyla dai-i mesuliyet harekâta tasaddi etmekle maznun bulunmuş olan Trablusgarp ve Bingazi ahalisi haklarında Hükûmet-i kıraliye ve aynı halde bulunan Adalar Denizi'nde Kain ve Hakimiyet-i Osmaniyeye tabi Cezayir ahalisi haklarında Hükûmet-i Osmaniye tam manasıyla bir affı umumî ye dahil değildir. Binaenaleyh hangi sınıf veya mevkide bulunursa bulunsun hiç bir şahıs esnayı muhasamatta icra ettiği efʼal-i siyasiye ve askeriyeden yahut izhar eylediği efkârdan dolayı şahsı veya emvali veyahut hukukundan istifadesi itibariyle takip veya tâzip edilemeyecektir.

Bundan dolayı mevkuf veya menfi bulunan eşhasın derhal sebilleri tahliye kılınacaktır.

Madde 5- İlan-ı harpten evvel tarafeyn-i âkideyn beyninde münakit veya merʼî bulunan bilcümle muahedat ve mukavelât ile her türlü taahüdat derhal tekrar kesb-i mer'îyet eyleyecek ve iki Hükûmet ile tebeaları beyninde muhasamattan evvel mevcut olan aynı vaziyet tekrar tesis ve iade kılınacaktır.

Madde 6- İtalya hükûmeti düvel-i saire ile münakit ticaret muahedatını tecdid ettiği sırada Devlet-i Âliye ile Avrupa hukuk-i düveli esası üzerine bir ticaret muahedenamesi akddetmeği taahhüt eder. Yani Devlet-i Âliye kapitülasyonlar ve bugüne kadar olan ukud ve saire ile mukayyet olmayarak bütün serbesti-i iktisadisini ve bilcümle Avrupa Devletleri misillû ticarete ve gümrüğe müteallik mevad ve hususatta icra-yı hareket hakkını itaya muvafakat eder. Şurası mukarrerdir ki salifüzzikir ticaret muahedenamesi canib-i Bab-ı Âli'den düvel-i saire ile aynı esas üzerine akddolunan muahedat-ı ticariye mevki-i tatbika vaz olundukta mer'iyyülicra olacaktır.

Bundan mada İtalya Hükûmeti memâlik-i şahanede rayiç üzere alınan resm-i gümrüğün yüzde on birden on beşe iblâğına ve âtiyüzzikir beş maddeye (petrol, sigara kağıdı, kibrit, küul, oyun kağıdı) yeniden insiharlar vaz'ına veyahut bunlardan istihlâk rüsum-ı munzaması istifasına muvafakat eder.

Şu kadar ki aynı muamelenin aynı zamanda ve bilâ fark memâlik-i saire ithalatı hakkında tatbik olunması meşruttur.