Kanuni Sultan Süleyman'ın terk-i sâlât edenlerle ilgili fermanı
süleymanşah bin selimşah han el muzaffer daima
mefahirü'l kuzat ve'l- hükkâm ma'denü'l-fazl ve'l-kelâm mevlâna vize kadısı zîde fazluhu tevki'-i refi-i hümâyûn vasıl olıcak malûm ola ki haliya taht-ı kazanda vaki' olan ibri köyü dimekle ma'ruf karye lhalkı ve kazâ-i mezbûrun sair ahalisi ikâmet-i salâtad tekâsül ve edâ-i ferâiz ve vâcibâtda tesâhül gösterüb ve ekser mesâcid harabemüşrif olub tâmir ve termîm olunmayub ve bazı eimme kur'an-ı azimin sıhhat üzere kırâatine kadir ve erkân-ı salâta alim olmayub ve bazı dahi şerân imâmeti münafi ba'zı efâl ve akvâl ve evsaf ile ma'ruf ve mevsûf iken imâmet eyledikleri paye-i serîr-i a'lâma arz olunmagın buyurdum ki hükm-i şerif-i lâzımü'l-ittiba'ım vardıkda bizzât mübâşeret idüb bu husus a'yân-ı vilâyetden bîgaraz müslümanlar mahzarında şer'ile teftîş ve teblig idüb göresiz vâk'i ise târik-i salât olanlara tenbih ve tehdîd idüb evkat-ı hamsede edâ-i salât etdüresiz temmerrüd ve inâd idenlerin şer'ile haklarından gelesiz ve harab olan mesâcidi dahi ehl-i mahallesine ve kurada olanı ehl-i karyesine ta'mir ve termim etdürüb muhtac-ı arz nesne vâki' olur ise yazub bildiresiz ve eimmeden şolki kur'an-ı azimin sıhhhat üzere kırâatine kadir veya erkân-ı salâta âlim olmayub yâhûd şer'an imâmeti münafî ba'zı ef'âl ve akvâl ve evsâf ile ma'rûf ve mevsûf oldugu tamam zâhir ve ma'lûm ola yirini mehmâ emken kur'an-ı azîmin sıhhat üzre kırâatine kadir ve erkân-ı salâta âlim ve şer'an imâmeti münâfi ef'âl ve akvâl ve evsâfdan müberrâ imâmete elyak ve ahrâ kimesnelere tevcîh idüb âsitâne-i sa'âdet penâhıma arz idesiz ammâ hakk-ı sarine tâbi' olub garaz ve taassubdan ve bu bahâne ile kimesnenin bîgayri vech-i şer'î ırzına ve malına halel gelmekden ve bi'l-cümle emr-i şerîfime muhalif iş olmakdan begayet hazer ve ihtiyat edesiz ve bunun gibi oldukda vilâyet kadıları taht-ı kazâlarında namâzcı deyu bir kimesne ta'yin iderlerimiş reâyâya ta'addi olurimiş imdi namaâzcı ta'yin olunmaga emrim yokdur bu husus için namâzcı deyu kimesne ta'yin iderlerimiş reâyâya ta'addi olurimiş imdi namâzcı ta'yin olunmaga emrim yokdur bu husus için namâzcı deyu kimesne ta'yin itmeyüb ferman-ı şerifim muktezasınca emr olunan nesneleri kendin bi'zzât görüb kimesneye hilâf-ı şer'-i şerîf ta'addi ettirmeyesiz şöyle bilesiz a'lâmet-i şerife itimâd kılasız tahriren fî evâhir-i recebü'l- mürecceb sene selâse ve hamsîn ve tis'a-mie.
konstantaniyye