Hapishanedeki mahkûmların kaçma teşebbüsü ve Adana'ya asker gönderilmesi

Hapishanedeki mahkûmların kaçma teşebbüsü ve Adana'ya asker gönderilmesi

Adana'da halk arasında olaylar çıktığı ve hapishanedeki mahkûmların kaçmaya teşebbüs ettiklerinin bildirilmesi üzerine olayların yayılmasına meydan verilmeden bastırılması için elden gelen çabanın gösterilmesi ve bölgeye asker gönderilmesi hususunda Harbiye Nezâretince Adana Kumandanlığı ile V. Ordu Kumandanlığı'na gerekli talimatların verildiği; bunlara ilâveten II. Ordu Kumandanlığınca da toplam 3 tabur nizamiye askeri hazırlandığı ve bunları Adana'ya götürecek geminin İstanbul'dan hareket ettiği (Tarih: 18 Nisan 1909) (BEO, 3536/265150)

Umum Erkân-ı Harbiye Dairesi
Üçüncü Şubesi

Hulâsa: Adana'da vuku bulan münâza‘aya dair

Ma‘rûz-ı çâker-i kemîneleridir ki

Ahali ile Hıristiyanlar arasında münâza‘a başladığı ve hapishânedeki mücrimîn kapılara hücum ile firara tasaddî etmeleri ve edilen nesâyihi kabul eylememeleri cihetle iki mahbusun telef ve birisinin mecrûh olduğu ve ahaliden vâki olan telefâtın başkaca bildirileceği Adana Jandarma Kumandanlığı'ndan mevrûd 1 Nisan sene [1]325 tarihli telgrafnâmede beyân olunmuş ve bahisle oraya serî‘an kuvâ-yı kâfiye yetişdirilerek hâdisenin tevessü‘üne mahal bırakılmadan teskini lüzumu Beşinci Ordu Müşiriyeti'ne ve lâzımı vechile ittihâz-ı tedâbîr olunarak teskin-i şûrişe sarf-ı mâ-hasal-ı ikdâm olunması dahi Adana Kumandanlığı'na tebliğ ve iş‘âr edilmiş olmakla ol bâbda emr u fermân hazret-i veliyyü'l-emrindir.

Fî 23 Rebîülevvel sene [1]327 ve 1 Nisan sene [1]325

Harbiye Nâzırı
Edhem

Sadâret-i Uzmâ
Mektubî Kalemi
Tarih: 23 Ra. sene [1]327 - 1 Nisan sene [1]325

Harbiye Nezâret-i Celîlesi'ne

Adana'da beyne'l-ahali vuku bulan münâza‘aya dair tafsilâtı hâvî Adana Jandarma Kumandanlığı'nın iş‘ârına atfen vârid olan 1 Nisan sene [1]325 tarihli tezkire-i devletleri mütâlaa-güzâr-ı senâverî oldu. Vilâyet-i mezkûreye Dahiliye Nezâretince vesâyâ-yı lâzıme icra kılınmış olduğundan nezâret-i müşârunileyhâdan taraf-ı âlîlerine de yazıldığı üzere en karîb mevâki‘den kuvâ-yı kâfiyenin âcilen sevki ve asayişin takrîri esbâbının cihet-i mülkiye ile müttehiden istikmâli zımnında icab edenlere tebligât-ı serî‘a ifasına himmet.

Umum Erkân-ı Harbiye Dairesi
Üçüncü Şubesi

Ma‘rûz-ı çâker-i kemîneleridir ki

Adana havalisindeki ahvâl-i malume-i iğtişâşkârânenin bir an evvel teskini hakkında ittihâz olunan tedâbîr cümlesinden olmak üzere taht-ı silaha celb olunan redîf taburlarından mâadâ İkinci Ordu'dan müretteb iki nizâmiye taburuna ilâveten Dedeağaç'da daha bir nizâmiye taburu ihzâr edilmiş olduğu İkinci Ordu-yı Hümâyûn Kumandanlığı'ndan ahîren vârid olan telgrafnâmede izbâr edilmiş ve mezkûr taburları bi'l-irkâb nakletmek üzere tertib olunan vapurun buradan tahrik olunarak keyfiyet Adana Vilâyeti'ne dahi bildirilmiş olmakla ol bâbda emr u fermân hazret-i veliyyü'l-emrindir.

Fî 27 Rebîülevvel sene 1327 ve fî 5 Nisan sene 1325

Harbiye Nâzırı
Edhem