Dedeağaç'ın sancak merkezi haline getirilmesi
- Bâb-ı Âlî
- Nezâret-i Umûr-ı Dahiliye
- Mektubî Kalemi
- Aded: 405
Huzur-ı Âlî-i Hazret-i Sadâret-penâhî’ye
Ma‘rûz-ı çâker-i kemîneleridir ki
Dedeağaç mevkiinin ehemmiyeti hasebiyle merkez-i livâ ittihâzı tasavvur olunduğundan buna karşı Dimetoka Sancağı’nın ne suretle kalması hakkında Taksim-i Vilâyât Komisyonu kararıyla vuku bulan isti‘lâma cevaben beyân-ı esbâb ve ehemmiyet ile oranın mutasarrıflığa ve Dimetoka’nın merkez-i vilâyetden idare olunmak üzere birinci sınıf kaymakamlığa tahvîli ifadesini şâmil Edirne Vilâyeti Celîlesi’nden meb‘ûs tahrirât üzerine bi’l-havale Şûrâ-yı Devlet’den tanzim ve i‘tâ kılınan mazbata leffen takdim-i pîşgâh-ı sâmî-i Sadâret-penâhîleri kılındı. Bunda Dedeağaç’ının ehemmiyet-i mevkiiyesine ve iş‘âr-ı mahallînin komisyonun tasavvurâtını müeyyid ve musaddık olmasına mebnî Dedeağacı’nın mutasarrıflık ve Dimetoka’nın kaymakamlık ittihâzı zımnında vilâyete Me’zûniyet ve İntihâb Komisyonu’na malumât i‘tâ ve teferruâtının icrası tezekkür kılındığı gösterilmiş olmakla suret-i karar nezd-i âlî-i Fehâmet-penâhîlerinde rehîn-i tasvîb olduğu hâlde keyfiyetin Adliye ve Maliye Nezâretleriyle makam-ı vâlâ-yı Fetvâ-penâhî’ye beyânıyla beraber vilâyete me’zûniyet ve komisyona malumât verilmek üzere taraf-ı acizîye emr u izbâr buyurulması bâbında emr u fermân hazret-i men lehü’l-emrindir.
Fî 28 Ramazan sene 1301 ve fî 9 Temmuz sene [1]300
- (İmza)
Devletli efendim hazretleri
Edirne Vilâyeti dahilinde kâin Dedeağacı mevkiinin ehemmiyeti hasebiyle merkez-i livâ ittihâzı Taksim-i Vilâyât Komisyonu’nca tasavvur olunduğundan ol hâlde Dimetoka Sancağı’nın ne suretle kalması lâzım geleceği komisyon-ı mezkûr kararıyla vilâyet-i mezkûre valiliğinden bi’l-isti‘lâm alınan cevabda Dedeağacı’nın günden güne kesb eylediği ma‘mûriyet ve ehemmiyet icabınca mutasarrıfılık merkezi ittihâzı muktezî ve Dimetoka’nın zaten merkez‑i vilâyete beş-altı ve şimendiferle bir buçuk saat mesafede bulunduğundan Dimetoka’nın birinci sınıf kaymakamlığa tahvîliyle merkez-i vilâyetden idaresi münasib idüğü bildirildiğinden ve Dimetoka Mutasarrıflığı’nın mahsûsât-ı hâliyesi şehrî on iki bin yüz yirmi ve Dedeağacı Kaymakamlığı’nın tahsisâtı şehrî iki bin iki yüz otuz kuruş idüğünden işbu mahsusât-ı hâliyeleriyle ber-vech-i iş‘âr Dedeağacı’nın mutasarıflık ve Dimetoka’nın kaymakamlık merkezi ittihâzı zımnında vilâyet-i mezkûreye me’zûniyet ve İntihâb Komisyonu’na malumât i‘tâsı ve Adliye ve Maliye Nezâretleriyle makam-ı vâlâ-yı Fetva-penâhî’ye beyân-ı keyfiyet olunması hususuna dair Şûrâ-yı Devlet Dahiliye Dairesi’nden tanzim olunan mazbatanın gönderildiği beyânıyla ifa-yı muktezâsı hakkında Dahiliye Nezâret-i Celîlesi’nden tezkiresi mazbata-i mezkûre ile beraber arz u takdim kılınmış olmakla ol bâbda emr u fermân hazret-i Padişahî ne vechile şeref-müte‘allik buyurulur ise infaz-ı mantûk-ı münîfine ibtidâr edileceği beyânıyla tezkire-i senâverî terkîm olundu, efendim.
Fî 10 Şevval sene [1]301 - Fî 21 Temmuz sene [1]300
- Said
Ma‘rûz-ı çâker-i kemîneleridir ki
Resîde-i dest-i ta‘zîm olan işbu tezkire-i sâmiye-i Sadâret-penâhîleriyle melfûf tezkire ve mazbata manzûr-ı âlî buyurulmuş ve ber-vech-i istîzân muamelât-ı mukteziyenin icrası hususuna irâde-i seniyye-i hazret-i Padişahî müte‘allik ve şerefsudûr buyurularak mezkûr tezkire ve mazbata iade kılınmış olmakla ol bâbda emr u fermân hazret-i veliyyü’l-emrindir.
Fî 11 Şevval sene [1]301 ve fî 22 Temmuz sene [1]300
- Ali Rıza