Darıdere Nahiyesi'nin Gümülcine'den ayrılması

Selanik Valisi’ne

Drama Sancağı dahilinde iken Gelibolu Sancağı’na ilhâk olunan Gümülcine Kazası idaresinden bi’t-tefrîk geçen sene müstakil kaza ittihâz olunan Darıdere Nahiyesi’nin Müdürlüğü lağv olunarak kemâ fi’s-sâbık Gümülcine Müdürlüğü cânibinden idare olunmak üzere nahiye-i mezkûrenin livâ-i mezkûra ilhâk olunduğu hâlde emr-i idare ve muhafazası dûçâr-ı müşkilât olacağından müstakil müdür ile idare etdirilmesi muhassenâtı mûcib olacağı fî 23 Şevval sene [12]78 tarihli ve yüz on bir numaralı tevârüd eden tahrirât-ı behiyyelerinde inhâ ve iş‘âr ve bu bâbda olan evrak tisyâr olunmakdan nâşî keyfiyet Meclis-i Ahkâm-ı Adliye’ye havale ile Kavânin ve Nizamât Dairesi’nde lede’l-mütâlaa Rumeli tarafında kâin bazı eyâlâtın livâ ve kazaları hakkında mukaddemâ tanzim kılınmış olan cedvele lede’l-mürâca‘a nahiye-i mezkûre müdürlüğünün lağv olunduğuna dair bir işaret olmayıp ancak burasının Gümülcine idaresinden tefrikinde beş altı yüz hâne kalmasından nâşî Dağardı Nahiyesi’nden dahi münasib kurrânın ilhâkıyla hasbe’l-usul iki bin hâneye iblâğ olunarak ayrıca bir müdürlük dairesi teşkil kılınması mukayyed ve mastûr bulunmuş ise de reviş-i iş‘âra nazaran maslahatın bu ciheti mahallince anlaşılamamış olduğunun savb-ı sâmîlerine bildirilmesi mahallince tezekkür olunmakla beyân-ı hâl siyâkında şukka.

23 Şevval 1278