Cemaati Terk Edenler Hakkında Üsküdar Kadısına Buyruldu
Üsküdar Kādîsı Fazîletlü Efendi;
Şi‘âr-ı İslâm ve şerî‘at-ı mutahhara-i hazret-i Seyyidü’l-enâm üzere i‘tikād ve i‘mâlini te’kîde ve tasfiyeye leyl ü nehâr ikdâm ve müsâra‘at ve ferâ’iz ve vâcibât ve sünen-i mü’ekkedâtın icrâsına kemâl-i ihtimâm ve ri‘âyet iddi‘â-yı dîn ü İslâm idene husûs ve umûm farîza-i zimmet ve lâzıme-i uhde-i diyânetden iken bu usûl-ı seniyye-i İslâmiyeye ekser-i nâs etrâfıyla ri‘âyet ve cidd ü sa‘y ile tahsîl-i vukūfa mübâderet itmeyüp ezân-ı Muhammedî okundukda oldukları mahallerde husûsuyla kahvehâne ve dükkânlarda oturup lâf u güzâf ve gıybet ve satranç ve mel‘abe-i sâ’ireye meşgūliyet ile câmi‘leri ve cemâ‘ati terk ve gider olur ise dahi şeyhleri ve vâ‘izleri dinlemeyüp hemân kaçıyorlar ve ma‘âzallahü te‘âlâ günâh-ı kebâyirden olan şurb-ı hamr ve sâ’ir me‘az-ı mürtekib olanlar dahi tövbe ve istiğfâr itmeyüp ısrâra cesâret ideyorlar. Bu gûne ef‘âl-i kabîhalara bir dürlü rızâ-yı hazret-i Bârî ve rızâ-yı pâdişâhî olmaduğundandan işte böyle illet-i vebâ ve sâ’ir gadab-ı Hüdâ zuhûruna sebeb-i müstakil olduğu hüveydâ olduğuna binâ’en husûs ve umûm mütenebbih olup menâhîden mübâ‘adet ve beş vakit namâzı cemâ‘atle edâ birle cenâb-ı Erhame’r-rahimîn inâbet olunmak üzere bundan akdem bâ-fermân-ı âlî tenbîh olunmuş ise de mütenebbih olmadıkları istihbâr olunmakdan nâşî el-iyâzen-billâhi böyle gaflete müstağrak ve semt-i hidâyete adem-i rağbet sûreti bundan böyle dahi envâ‘-ı gazab-ı Hakk’ı müntec olacağı âşikâr olmağla imdi bi-mennihi te‘âlâ bundan böyle ümmet-i Muhammeddenim ve Müslümânım diyenler dîn u diyânetlerine müte‘allik mes’eleler öğrensinler ve ezân-ı Muhammedî okundukda bulundukları mahallerden hemân câmi‘ ve mescidlere cemâ‘at-i şerîfe gitsünler ve bulunan şeyhleri ve vâ‘izleri dinleyüp hulûs-ı kalb ile te’ib-i müstagfer olsunlar. Mahallât imâmlarını ve esnâf kethüdâlarını ve iktizâ idenleri huzûrunuza celb ile etrâfıyla ifâde ve tenbîh ve bundan sonra dahi bu nasîhati dinlemez ve câmi‘a gitmez her kim olur ise hemân imâmları ve ihtiyârları ve zâbitleri ma‘rifetiyle ahz ve te’dîbât-ı meşrû‘aları icrâsıçün i‘lâmınız ile beher-hâl Bâb-ı Âlî’ye irsâle mübâderet eyleyesiz deyu buyruldu.
Fî 10 Za sene 1227/15 Kasım 1812
|
Kaynak: Çetin, E. (2018). 1812-1814 Veba Salgınının Üsküdar'a Etkileri. 1, 191-215.çevrim içi erişim 
İlk kez Osmanlı İmparatorluğu'nda yayınlanan bu çalışma devletin uluslararası telif anlaşmalarına taraf olmaması sebebiyle kamu malıdır. 
|