Cebel-i Bereket ve Haçin'e gönderilecek askerî birliklerin bir an önce sevk edilmesi

Dahiliye
Mektubî Kalemi
Tarih: 28 Rebîülevvel sene [1]327 - 6 Nisan sene [1]325

Harbiye Nezâret-i Celîlesi'ne

Adana Vilâyeti'yle Cebel-i Bereket Mutasarrıflığı'ndan şimdi alınan telgrafnâmelerde iğtişâşât vilâyetin diğer cihetlerine de sirayet ederek elde kuvâ-yı kâfiye bulunamamasından ve müretteb taburlar da henüz vâsıl olmamasından dolayı tedâbîr-i mâni‘aya bi'z-zarure tevessül edilememekde bulunduğu ve Haçin Kasabası pek ziyade haiz-i ehemmiyet olup orada da başlayan müsâdemâtın mevki‘en karîb olmak cihetiyle Zeytun Kazası'na kadar tevessü‘ü kaviyyen muhtemel bulunmasına binâen Maraş'da taht-ı silaha alınmakda olan redîf taburlarından ikisinin doğrudan doğruya Haçin'e, diğer ikisinin de Cebel-i Bereket'e ve Aziziye ve Kilis Taburlarının dahi yetişdikleri anda kezâlik mevâki‘-i mezkûreye sevk ve i‘zâmı icab-ı hâle muvâfık olarak Haleb Vilâyeti'ne bu vech ile iş‘âr-ı keyfiyet edilmiş ise de redîf taburlarının bu gibi ahvâlde işe yaramadıkları ve şûriş ve iğtişâşın âcilen ref‘ ü izâlesi her hâlde muntazam bir fırka-i nizâmiyenin vücuduna mütevakkıf olup binâberîn bu cihetin selâmet-i vatan nâmına nazar-ı dikkat ve ehemmiyete alınması kat‘iyyen elzem bulunduğu dermiyân olunmakdadır. O havalide zuhur eden şûrişin gitdikçe tevsî‘-i daire-i sirayet etmekde bulunmasına nazaran kuvve-i mürettebe-i askeriyenin tesrî‘-i sevkiyâtına son derecede itina edilmek derece-i vücûbda olduğundan ve muntazam bir fırka-i askeriyenin tertib ve sevki hakkındaki iş‘âr-ı mahallî dahi nazar-ı dikkate alınmak lâzım geldiğinden ona göre icab-ı hâlin serî‘an icra ve inbâsı hususuna himem.