Bu sayfa istinsah edilmiş
oglanuñ anası emcegin bir sıkdı südi gelmedi iki sıkdı südi gelmedi üçüncide gendüye darb eyledi kanı toldı sıkdı süd ile kan karışuk geldi tag çiçegiyile südi oglanuñ yarasına urdılar oglanı ata bindürdiler alubanı ordusına getdiler oglanı hekimlere ısmarlayup dirse hândan sakladılar
at ayagı külüg ozan dili çevük olur hânum oglanuñ kırk günde yarası oñaldı sapasag oldı oglan ata biner kılıç kuşanur oldı av avlar kuş kuşlar oldı dirse hânuñ haberi yok oglancugın öldi bilür
ol kırk nâmerdler bunı tuydılar ne eyleyelüm deyü tanışdılar dirse hân eger oglancugın görür ise arturmaz bizi hep kırar dediler gelüñ dirse hânı tutalım ag ellerin ardına bağlayalum kıl sicim ag boynına takalum alubanı kâfir ellerine yönelelüm deyü
