Ol menem kim yüz tutub âyîne-i insâna men
Fazl-ı Rahman’dan eriştim sûret-i Rahmân’a men
Secde idüb rûh-i kudsî tek önünde âdemin
Okuram esmâ-i hüsnâ uymazam şeytâna men
Genc-i Tâhâ’nın tılısmı keşf edelden dest-i gayb
Âlem-i ta’lîm-i ilm-i Alle-mel-Kur’an’a men
Sâki-i bâkî bana bir bâde nûş ettirdi kim
Hızr-ı vakt oldum eriştim çeşme-i hayvâna men
Zülfünün küfrünü her İsâ nefeslu dilberin
Nûr-i îman bilmeyince gelmedim îmâna men
Şol kamer devrinde bağlar anberin çevgân içün
Başımı top eyledim girdim bu gün meydâna men
Ey Sürûrî âlem-ül-kaybın cemâlin görmüşem
Can gözüyle bakmışam tâ sûret-i insâna men
Zâhidâ esmâ-i küllînin müsemmâsı nedir
Yâ Hak’ın ayn-ı müsemmâ, olan esmâsı nedir
Ârif-i bezm-i ezel olmak ne menzildir yakin
Yâ şerâb-ı vahdetin câm-ı musaffâsı nedir
Mısr-ı câmi’ cum’ası âyîne niçündür aceb
Yâ sevâd-ı a’zamın anda temâşâsı nedir
Vâkıf-ı sırr-ı Yemînullah isen şerh eyle kim
Kâbe’nin kendi şeb-i mi’râç esrârı nedir
Vâdi-i eymende Mûsâ-yi Kelîmullah içün
Âteş-i İnnî enallah’ın tecellâsı nedir
Sûr-i İsrâfîl’e kandendir hayât-ı kâinat
Rûh-i kudsün nefha-i İsâ’da enfâsı nedir
Kangı mazharda zuhûr eyler beyân-ı Kul kefâ
Hüccet-ül-kaim kani gelmez mi da’vâsı nedir
Şâhbaz-ı rûh-i süfli âşiyânın terk edüb
Âlem-i ulvîye pervâz etse me’vası nedir
Ger kalâmullah-ı nâtık okudunsa söyle kim
Kaf vel-Kur’an ile Yâsîn ü Tâhâ’sı nedir
