Hejde hezâr âleme yetti kamu zafer
Her kim ki dedi sıdk ile bir kerre yâ Ali
Mecmû’-i âferînişe tesbîhdir bu kim
Sallî alâ Muhammed ü Sallî alâ Ali
Hurşîd-i âsmân-ı velâyettir ol kamu
Dîdâr-ı Hak’ka âyine-i enbiyâ Ali
Nûr-i vücûdu görmez idi çeşm-i kâinât
Şâm-ı ademde olmasa bedrüddücâ Ali
Tutgil Sürûri dâmen-i Âl-i abâ’yı kim
Âlemde destgîr ola dâim sana Ali
Zâhid ki yüzünde göremez nûr-i tecellî
Yâ Rab ne ümîd ile olur gönlü teselli
Her sûret-i zîbâya sücûd olmasa vâcib
Mecnûn’a kaçan kıble olurdu ruh-i Leylî
Çün Tanrı cemîlim dedi meyl etti cemâle
Pes ahsen-i takvîme kimin olmaya meyli
Hüsn ile beşer olmasa mahbûb-i İlâhî
Kevn ile mekân âdemin olmazdı tufeyli
Ya’ni ki Sürûri’de vü sevdiği güzelde
Âdem’dir eden sûret-i Fazl ile tecellî
Ey gönül gel dîde-i tahkîk ile eşyâya bak
Sûret-i kesrette vahdet gösteren ma’nâya bak
Bilmek istersen kelâmullah-ı nâtık şerhini
Âdemin vechinde metn-i Allemel’esmâ’ya' bak
Can gözün Mâzâğe kûhlinden mükâhhal eyleyüb
Sûret-i Hak görmek istersen ruh-i zîbâya bak
Dilrübâlar çehresinde andelîb-i kuds olub
Arş gülzârına pervâz et gül-i ra’nâya bak
Bulmak istersen Mesîhâ tek dem-i Rûhülkudüs
Hızr-ı vakt ol câm-ı Cem’den bâde-i hamrâya bak
