Kul Yetim ağlar yerinir
Aşk hayâliyle sürünür
Cennet-i Rıdvan görünür
Şol güzelin kaddi bana
Bihamdillâh yine bir hoş demim var
Ferâgat âleminde âlemim var
Dü âlem işret ü ayşına virmem
Derûn-i dilde cânâ bir gamim var
Cihânın az u çoğundan geçelden
Gönülde sanma kim bîş ü kemim var
Salındırmaz muhîti kirpiğine
Benim cism-i terimde bir nemim var
Duhân-ı âha sertâpî boyandım
Yetim âh itmeyim mi mâtemim var
— Murabba —
Levh-i dilde nice bir nakş-ı vekar eyleyelim
Ser ü sâmânı koyub aşk ile kâr eyleyelim
Zerd olub âlem-i tecride güzâr eyleyelim
Gel kalender olalım terk-i diyâr eyleyelim
Her ne kim hâtıra olsa yuyalım âb gibi
Kâinâtı görelim vâkıa-i hâb gibi
Şark u garbı gezelim mihr-i cihantâb gibi
Gel kalender olalım terk-i diyâr eyleyelim
Câme-i âriyeden bu ten-i hâkîyi soyub
Ârdan âri olub neng ile nâmûsu koyub
Baş açık yalın ayak kafile-i aşka uyub
Gel kalender olalım terk-i diyâr eyleyelim
Yine âlâyiş-i dehri yuyalım pâk olalım
Girelim bir nemede âşık-ı bîbâk olalım
