Efrâd-ı redîfeden tabûru silâh altına alınacak olduğu halde bedel vermek isteyenler için ittihâz olunacak usûlü şâmil ve beş bendi müştemil nizâmnâmedir:
Birinci Bend: Asâkir-i redîfe efrâdından olup da mensûp olduğu tabûr silah altına da’vet olunduğu zaman bedel vermek isteyenler zîrde ta’yîn olunacak şerâite tevfîkan müddet-i redîfesi içinde genç ve dinç iki re’s hayvan besleyecek ve işbû hayvânları taraf-ı devletten her ne zaman istenilür ise hemen i’tâ eyleyecek ve şâyet müddet-i redîfesi zarfında lüzûmu olmayıp istenilmez ise müstahfiz tezkiresini aldığı anda tabûru merkezine teslîm edecek ve şu hayvanları nezdinde bulundukça zedelemeyecek sûretle kendi umûrunda dahî kullanabilecektir.
İkinci Bend: Böyle bedel hayvanı tedârik edecek olanlar redîf tezkeresini aldıkta tabûru merkezine gidip kendisinin hayvan besleyeceğini tutulacak defter-i mahsûsa kaydettirecek ve redîf tezkeresini aldığı vakit şu usûlü ihtiyâr etmeyip de bir müddet sonra hayvan vermek arzu eylediği hâlde yine kabûl edilecek ve fakat tabûru silah altına da’vet olununcaya kadar kendisini defter-i mahsûsuna kaydettirmeyip de tabûru da’vet olunduktan sonra hayvân vermek isteyenlerin verecekleri hayvanlar kabul olunmayıp kendilerinin bizzât silah altına alınması veyâhut bu misillûlerden bedel-i şahsî ahz olunması iktizâ edecektir ve fakat bu bedel-i şahsînin sâbıkı gibi neferât-ımüstebdeleden bulunması lâzım gelecektir.
